詩歌創作係咪需要用嚴謹嘅神學標準嚟審視？歌曲用詞又要點處理？兼顧創作空間之餘，仲要考慮埋神學理念，兩者之間應該點取捨？

早前，《時代論壇》報道ACM @hkacm_worship 顧問朱浩廉係ACM研討會嘅分享，指詩歌創作唔可以用神學論文或者廣告標準去衡量質素，因為創作係件藝術品，所以唔應該用太過嚴謹嘅神學標準，如果唔係就好難係教會到傳播。

而BUCB @hkbucb 教練伍家豪亦認同，認為創作團隊只係用自己角度跟別人分享對信仰嘅體會，但佢都明白會有聽眾擔心詩歌歌詞不合乎聖經，但佢認為「聖經沒有阻止的就可以做」，可有更多自由發揮創意。

說法隨即引起討論，有人直指︰「唔同意。詩歌歌詞係係崇拜入面塑造教會一般信徒神學觀念嘅最重要途徑，沒有之一，比講道更入心入腦，點可以唔嚴謹？」亦有人覺得，詩歌首要考慮嘅係靈性扎根嘅培育，而短暫嘅感受唔係敬拜者所追求。更有人反問係「取悅人定取悅神？」。

而春麗亦有分享指，「唔應該用太過嚴謹嘅神學標準」依句說話可圈可點，一句說話可以引來唔同問題。過於嚴謹係指緊邊一方面？神學標準又係講緊咩標準？

WORSHIP NATIONS @sogworship 負責人方文聰亦有係春麗到留言，話記得《立志擺上》入面句歌詞「願鴿子天際降下來」都曾經比人批評，覺得好嬲，認為係連一般嘅文學手法都容納唔到。又話可以留意下啲敬拜團隊嘅Youtube留言，就知咩係「過於嚴謹」。

但《道成搖滾》作者鄧智文就話「呢種『唔應該用嚴謹神學標準』嘅想法，外國左中右嘅音樂神學派別都唔會同意。」

文：CJ