63%中學生怕除罩相見
唔經唔覺戴咗兩年幾口罩，唔知你仲記唔記得，大家口罩遮住個樣係點嘅？
校園除咗係畀學生讀書明理，本來都係學習社交、同人相處嘅地方，但疫情之下嘅各樣措施，似乎對呢代年青人嘅成長，帶來好大嘅負面影響。
路德會社會服務處今年6月用問卷問咗1051個中學生，發現有63%驚第日要同人除罩相見、62%喺社交距離措施下社交意欲下降、48%比疫情前更驚面對面嘅社交場合、40%因為社交距離措施搞到同人聚會都有罪惡感，仲有22%覺得同人溝通能力下降，擔心未來前景壓力增加。
該處單位主管朱家賢喺港台節目話，長期戴口罩之下，大家逐漸習慣隱藏自己嘅表情以至情緒，前線社工都觀察到，學生參加小組活動時社交能力出問題，有啲唔知點樣打開話題，亦都因為觀察唔到人哋表情，會以為人哋唔鍾意佢，甚至驚咗同人接觸，有溝通能力下降嘅情況。
朱家賢提醒青少年人，重視同覺察返自己嘅社交需要，喺遵守防疫措施底下，都可以持續參與社交場合，鞏固返同朋輩之間嘅網絡；如發現自己社交上有負面感受，都可尋求社工協助。
文：LH
