耶穌係咪長頭髮？

噚日講到男人竟然因為長頭髮被教會cut事奉，唔少留言都用到「耶穌都係長頭髮」嚟反駁，證明耶穌長頭髮嘅形容非常深入民心！其實真係一啲都唔出奇，無論係小朋友睇嘅漫畫聖經，以至各種藝術同影視作品入面嘅耶穌，都係長頭髮。喺製圖軟件入面search「耶穌」，圖案十個有十個都係長頭髮嘅。

更加誇張嘅係，早排有一位印尼網紅直播時叫「耶穌剪頭髮」，結果當地基督教團體報警，佢嘅言論被裁定影響公共秩序同宗教和諧，個網紅最後更被判入獄2年10個月，連國際特赦組織都出聲，認為係對言論自由嘅嚴重打擊，呼籲當局撤銷佢嘅定罪。

真實嘅耶穌係咪長頭髮嘅呢？其實都有唔少爭議。大約10年前英國科學家尼夫（Richard Neave）就研究3個考古學家發掘出嚟、同耶穌年代相近嘅閃族人頭骨，再參考《聖經》嘅內容同埋相近時期嘅藝術品，得出嘅耶穌形象，唔係有飄逸啡色長髮嘅白人男子，而係有濃密嘅鬍鬚同埋短捲髮、膚色黝黑嘅男子。

但係近年又有人用AI技術，用都靈裹屍布嘗試還原耶穌形象，結果又係一個長髮男人喎。不過，有人就質疑呢個AI工具應該仲參考咗其他耶穌畫像，而且就連都靈裹屍布本身嘅真偽，其實都無法確定。至於因長髮被cut事奉嘅苦主阿皮就話，中世紀畫像將耶穌畫成長髮，其實係參考典外文獻《倫圖羅斯書》，內容係有個人寫信畀彼拉多，當中有描述耶穌外貌特徵，不過都有人質疑呢本書係咪後人老吹。

不過，其實真實嘅耶穌係點嘅樣，聖經根本就無明確描述，最直接嘅講法就係佢「無佳形美容」，唔靚仔、無人羨慕、被人藐視。所以如果以貌取人，根本就唔會留意到耶穌。聽日就係受苦節，或者比起耶穌係點嘅樣，更值得我哋去諗嘅，係佢所做嘅事：誠然擔當我哋嘅憂患、背負我哋嘅痛苦、為我哋嘅過犯受害。

文：LikHang