毋須放大恐懼：訪歐洲賣藝旅居作者Max Chan

你有冇一啲好想做、卻唔敢去做的事？去年到了歐洲吹口風琴賣藝旅居一年，並將經歷寫成書的陳杳然（Max）坐在觀塘工作間的塌塌米上，一邊斟茶一邊說，「好少因為恐懼而卻步，我真心覺得生命係無常，下個月我哋都唔知喺唔喺度。」

▍ 香港聲音「急促、唔穩定、壓逼」

Max去過丹麥的奧胡斯（Aarhus），那裡的人之間距離甚遠，但有人會從遠處拍掌欣賞他的演出。如果用節奏去形容香港，Max覺得是「急促、唔穩定、壓逼」。在街上行慢啲，都會畀途人嗤之以鼻，嫌阻住佢，有種壓力要逼自己改變步伐，去迎合城市。他回港之後無意賣藝，就是因為覺得香港太快，「冇空間停低欣賞任何嘢」，同時也沒有讓他感到自在的賣藝角落。他覺得，香港人與人的距離太近，無時無刻都有好多情緒，去街市買個餸都可能聽到人鬧交，嘈音的頻率很難讓自己內心安定，梳理感思、聆聽自己的聲音。

情緒並非壞事，Max覺得只是香港太多資訊，卻往往未聽人講完就急住畀comments，好多人惟有收埋情緒，鬱成問題。「揾唔到咁樣的空間，惟有自己創造一個。」他在觀塘工作室會為來賓揭塔羅牌，但既非占卜，也不是提供意見，只是借助圖像，讓客人沉澱生活經歷，講出來給自己聽。情緒一旦塞滿垃圾桶不清理，就會產生雜音。不過，即使是「垃圾」，仔細審視，可能發現某張廢紙竟是某撕下來的書頁，記載了一段重要的往事。

▍ 照顧自己唔係自私，已經幫緊其他人

他為來賓揭塔羅牌，都是自由定價，而且有一半收入會送給浪浪之家，因為想表達「願意照顧自己唔係自私，已經幫其他生命。」他無意批評坊間做法，但也會質疑，如果每節收$1200，又有多少人付得起？他希望各人都能按自己財政能力，照顧自己。

Max形容，如果用香港的標準衡量，「我唔係成功嘅人」，沒買車、買樓、沒頭銜，但他覺得，錢雖然重要，但足夠交租support到自己就夠；雖然興趣的確可以用來賺錢，但他不覺得付錢支持比心靈上的支持更實際，並認為他的音樂能建立一些連結，更重要。他並非特意去幫人，正如他去歐洲賣藝是為了自己，沒想過要出書，但成書後，仍會有人受到一些啟發，而Max認為，「只要畀到力量（佢哋）去揾佢哋想過嘅生活，就夠。」

玩音樂、睇塔羅、斟茶，Max說自己不是「十年磨一劍」那種人，喜歡探索不同興趣，但對每件事都有要求，雖然未必做到頂尖，但至少「周身刀張張利」，對自己以及別人負責任。

▍ 唔好放大恐懼，問自己驚啲咩

去歐洲賣藝旅居，好多香港人都會問「生唔生活到？」但Max覺得，與其因恐懼而卻步，不如思考自己害怕甚麼。例如「唔夠錢」。他指出，不能否定事實，在歐洲生活的確貴，而自己又不是能睡青年旅舍16人房的人，住宿需要一定洗費。但他去歐洲12個國家、14個城市，卻只用了五萬，扣除賣藝萬餘元收入，只須不足三萬，而且不須捱餓，有時甚至可以煮超市的肉扒吃。他承認，某些人確實連三萬都付不起，但也認為有很多人都付得起，阻力不在「缺錢」。

Max續問，如果夠錢先敢去旅居，「幾多先夠？」儲到100萬先去嗎？他覺得即使你儲到，到時都不會去，可能會等到200萬、500萬，到了1000萬又覺得可以買到首期。他提醒「唔好放大恐懼」，雖然未雨綢繆是人保護自己的方式，但如果成為實現理想生活路上的障礙，又何苦？他認為要問自己害怕甚麼——怕語言不通？生保床？孤獨？唔夠錢？如果係唔想冇咗份工，想住得舒服啲，那不是問題，「但至少對自己誠實，唔好畀藉口自己，話係冇錢先唔去」。

他寫的書名叫《一吸一呼之間》，Max解說除了音樂，生命也不過是一吸一呼之間，那些當下連成的故事。世界崩壞，令他確信「下個月你同我都唔知喺唔喺度」，所以他不會想得太遠，但同時不是毫無準備。比起用賣藝作此後賺錢的噱頭，他更嚮往見步行步的生活方式。「雖然我好彩，好早揾到音樂呢個生命核心，但我唔覺得需要逼自己咁快要有核心。」

文：Jon
（封面相片、演出片段由 @maxchan_miuyin 提供）

（內容於3月17日曾作修訂）