名校仔、醫學生、移英律師的「成功的反思」
今個星期一嘅文章〈有得讀大學，係咪純粹自己功勞？〉提到人嘅成功總有幸運成份，對基督徒來講更係上主恩典，喺threads上都引起唔少「成功的反思」。細個讀傳統名校嘅「wandererinthezoo」記得，中六時有一日老師同佢哋講，可以坐得喺呢個課室嘅，都係好好彩嘅人，預見佢哋以後都會喺社會嘅中上層，叮囑佢哋永遠唔好忘記，社會上其他無咁privileged嘅人，要好好運用自己嘅影響力去幫佢哋，「呢段話我真係會記一世」。
▍ 醫學生：I am at a very privileged position
醫學生「greenmedstudent」都記得高中時有個通識老師送過桑德爾嘅《正義》畀佢，係第一本令佢靜下心來，諗一諗自己今日呢個位置因咩而成嘅書。因為睇咗呢本書，令佢改變咗好多，諗多咗世界除咗自己所眼見，仲有好多自己見唔到嘅因因果果。佢認為教育係啟蒙（enlightenment），有啲人「見過火之後，反而會笑未見過火嘅人」，但其實「唔係個個都咁好彩知道咩係光」。
讀緊醫嘅佢形容「巡房」某程度上都係privilege，係喺香港呢個獨特嘅時空背景之下嘅產物，而佢讀醫六年成日來將「I am at a very privileged position.」 呢句說話掛喺口邊，亦確實抱持咁樣嘅信念，喺受到啟蒙、得到教育時會更加感激，「多謝教過我嘅老師們」。
▍ 移英律師：作為成功者要諗下點樣服事他人
一位形容自己係「Full-time mum, part-time lawyer」嘅移英港人「life_with_a_math_nerd」就話，可能因為出生基層，又從小返教會，加上讀書唔係臥薪嘗膽式嘅勤力，自己從小就好有一份自覺：「讀書叻係我幸運，作為教育制度嘅成功者，我要諗下點樣服事他人，而唔係利用自己讀書叻嘅privilege去舔盡成績好嘅紅利。」所以佢曾經公開試前開讀書小組幫同班同學「補習」，後來又喺教會幫班細路操oral。
畢業之後，佢以往覺得自己不成比例地高人工，「總覺得自己比起清潔工、農夫、工人等所謂比較基層嘅工作無實質嘅生產力，但偏偏人工又會高好多。」而家嚟到英國，專業人士同藍領薪酬差距窄好多，個人層面真係要啲時間適應同接受，但某程度上佢又覺得，係實現咗我一直覺得應該有嘅社會公義。
