你鍾唔鍾意動物？如果喺山野撞到蛇，你會驚嗎？今年農曆蛇年，《低聲道》訪問咗開爬蟲舖的店主Samuel，請佢講吓寵物蛇的習性，同野生的蛇又有咩唔同。

▍ 第一次抱蛇戰戰兢兢，但寵物蛇好少咬人

Samuel說，雖然自己細個就鍾意動物，又「先斬後奏」在家養龜，但蛇都係大個咗先接觸，而第一次抱蛇時，都難免戰戰兢兢。他又指，爬蟲舖的客人主要都是找龜，一些爸媽更會好擔心咁問「有冇蛇？」，也驚用來餵蛇的雪藏鼠屍。但又有些女學生會特意上來睇蛇，覺得「好可愛」。

但他指出，香港唔准養毒蛇、大蛇，而且寵物蛇經過多代馴化，即使緊張也未必會咬人，例如球蟒就只會捲成球狀，所以養蛇其實很安全。自細有養狗的Samuel說，雖然哺乳類較能與人共情，但跟爬蟲也有一定的溝通，例如Samuel一打開露台，龜就認得係佢，會跟住出嚟曬太陽。而蛇同龜一樣認得人，如果係生保人餵嘢食，明明隻雪鼠喺前面，都會亂咁啄。

▍ 除非生命受威脅，野生蛇唔會主動咬人

Samuel提醒，如果在郊野遇到蛇，最好都是盡快離開，但「唔建議用武器」攞樹枝篤。他指出，蛇的感觸很敏銳，單憑地上的震動頻率就能辨認人的步速及體型，即使未能感通人的情緒，單從起雞皮這等微細的動作，就可知道你有幾緊張。你一緊張，蛇也會緊張，所以亂篤反而更危險。一般嚟講，蛇都係鍾意揾啲潮濕陰暗的地方匿埋，無咩事都會避開人，唔使搞佢。

他又解說，野生蛇天生天養，生咗蛋都係自然孵化，蛇仔出咗世第一餐就自己揾食，所以存活率好低，而每胎都「成餅蛋咁生」，甚至同一條精子可以授精兩至三次。生得健康的蛇不定時蛻皮，連覆眼的鱗片都會一併脫落，蛻皮之前還會「反白眼」呢。不過，如果不健康，蛇皮會棘住，有啲位甩唔到。野生的就要自生自滅，是寵物的就可以餵維他命。

▍ 蛇真係咁靈巧／蠱惑？

聖經形容蛇是「靈巧」，又是蠱惑人心的象徵，Samuel覺得蛇的確聰明盞鬼，例如豬鼻蛇會扮死反肚，而且不只是生命受威脅時的反應，就算係生保人幫佢換水，佢都一樣會反肚。而蛇身上有多條肋骨，不像人類那樣接合，所以能在地上爬行，而頭骨也沒有鎖住上下顎的牙骹，所以嘴能張得很大，吞下體型較大的獵物。

Samuel解釋，雖然自己與合夥的朋友都沒有信教，但爬蟲舖取名「Art of God」，是因為他在基督教中學長大，受某些觀念影響，也覺得每種動物都有自己的美，巧奪天工。

文：Jon

（採訪：Jon、Betsy）