喺打羽毛球同埋簽承諾書以外，香港嘅學校同教會仲會點樣講性教育？第三集《低聲圍爐》邀請咗幾個後生仔女，同小編一齊傾傾佢哋經歷過嘅性教育。

學校係點講性教育，班後生仔女其實印象唔多，最深刻嘅都係啲恐怖嘢。有個女仔深刻嘅係中學搵咗個女仔「講見證」，佢因為婚前性行為最後要落BB，將個過程形容到好仔細好血淋淋，勁恐怖。佢覺得咁樣「靠嚇」真係好離譜。有個讀男校嘅男仔就諗起，試過有人喺早會講生性病嘅嘢，仲展示一張生晒嘢嘅生殖器官圖片，令佢覺得好核突，不過對一班中二、三嘅男仔嚟講，睇完相其實都係當笑話笑吓。

課堂上嘅性教育都係當笑話，最印象深刻嘅反而係成班男仔圍埋「自學」，其實即係講下衰嘢。反而比較能夠有空間好好講吓，佢記得係學校團契入面，喺亂噏講衰嘢之餘，都可以認真地傾吓。佢話當時有個牧者願意真誠地分享經歷，以至今天雖然已經係大人都仍然面對嘅掙扎，聽到咁真誠嘅分享，令大家都可以分享到掙扎，過程中幾塑造到佢嘅性觀念。至於幾個女仔，普遍都覺得女仔朋友之間好少認真討論性嘅話題，最多都係攞嚟講吓笑。

至於教會就更加少講到性，最多係「戀愛週」之類會講到戀愛嘅問題。有個男仔就話，通常都係請所謂基督徒「模範夫婦」嚟分享，講佢哋點樣由拍拖行到結婚，但普遍都唔會講到關於性嘅話題，令佢以前細個時會覺得，基督徒拍拖就對性係零接觸同認知咁樣。有個女仔就覺得，咁樣令到好多教會嘅女仔到結咗婚，可能都無呢方面嘅知識。

有個幾十年前嘅後生仔聽完，就覺得其實咁多年來香港嘅性教育都差唔多，學校都係分開男女各自講，講完都唔記得聽過啲咩，剩係記得好想知對面講乜，但最後都問唔到。教會團契又係有週會講下戀愛，有哥哥姐姐答下問題咁。至於承諾書佢當年就未興，印象中係八、九十年代美國一啲極保守嘅基督教組織發明，佢見過最過癮嘅係承諾書後面有張優惠劵，「簽咗承諾書，買pizza平啲。」

小編都有同個基督徒老師傾過，佢覺得最根本嘅問題，係學校其實唔應該導向學生「拒絶婚前性行為」，因為從佢嘅經驗，立場先行既性教育，係「最廢最無效嘅教學方針」，就好似聖經科第一堂就叫學生「一定要信耶穌唔係落地獄」一樣，係正面定負面宣傳，大家都心知肚明。

呢位老師認為，任何價值教育，必先要預設學生有選擇嘅權利先有可能成功，要成功說服學生認同你嘅價值觀，唔係純粹「口裏說不」，應該要喺一個開放嘅空間，羅列相關既正反論點同論據，由學生自主地建構自身觀點同立場，如果你嘅價值觀係咁理所當然地正確，學生最後係應該可以達致同樣結論嘅。

文：LikHang