張家朗一句「返工加油」，令一眾打工仔精神為之一振。MLA有云：「邊個發明了返工」，就算要做社畜，都要做隻識得呻嘅社畜，如果做到「訴求就係返工」，就等如港豬。不過，點解我地要返工？如果無得揀，一定要做人地隻狗，咁仲係唔係上帝想我地打嘅工？

▍    幫埃及人打工，有咩意義？

呢個問題，昔日以色列人應該一定有問過。約瑟做咗埃及宰相，喺饑荒之年救咗自己全家，但佢死咗無耐，埃及法老就將以色列人貶做奴隸。本來有宰相加持，生活過得幾好，突然要做苦工個心一定唔服，但無人出嚟反抗，就逆來順受，「揾食，無計啦」。

摩西睇唔過眼，見到有個埃及人打以色列手足，就忍唔住出手打死咗佢。點知佢族人唔單止唔服佢，仲趕佢走。就算之後摩西帶佢地出咗埃及，唔使再打苦工，每日都有嘢食，呢班人竟然掛住埃及份工，「雖然辛苦啫，但起碼有好嘢食、有地方瞓」，唔使喺曠野餐風宿露。

唔想做人隻狗，但有機會出走做狼，卻又掛住主人嘅狗糧，甚至為咗三餐唔介意畀狗圈綁住。呢個矛盾，自嘲社畜嘅我地，可能都唔陌生。

▍    畀人㩒住嚟打，幾時先可以逆轉勝？

上帝叫以色列人離開埃及，走進曠野，唔通我地今日都要離開城市，去沙漠修煉？耶穌雖然有退入曠野受試探，又不時上山禱告，但佢平時都走進人群，呼召一個個被病痛纏擾嘅人，只係佢唔會停留喺某城某鄉太耐。

耶穌走咗咁耐，講好會再返嚟，但咁多年嚟世界沒有最壞只有更壞（仲未計教會黑歷史），基督嘅故事對相信基督為救主嘅人嚟講，就好似約瑟對以色列人嚟講咁遠。住喺香港嘅我地，有時都好想天國依家就嚟。「上帝仲等啲咩？嫌世界未夠黑暗？定係根本就無上帝？」

詩篇13篇係類似嘅經文，當時大衛畀掃羅王軍隊追殺。上帝好似唔再理佢，敵人殺到埋身，朝早逃亡，夜晚失眠。用廣東話意譯可能就係：「耶和華呀，我畀人㩒住嚟打，幾時先可以逆轉勝呀？」大衛雖然搶人老婆、又推人上戰場送頭，但佢至少無自己動刀殺掃羅。

耶穌話「你地會有苦難，但唔使驚，我已經勝過世界。」呢句同我地認知嘅相反，世界睇落無好轉嘅徵兆，餓死、戰死、猝死、鬱死無日無之，想打都打唔過。跟隨上帝係要打，不過唔係自己動刀，而係等聖靈亮劍。耶穌已經贏咗，雖然對家垂死掙扎，所以睇落更加猖狂。

禾場大要開工，但落場好危險。險還險，有上帝嘅防具，護心鏡、盾牌、頭盔，其實擋得住惡魔嘅長短攻擊，所以又有平安。「趁仲係日頭就好開工喇。等到夜晚，想做都無得做。」（約翰福音9：4，意譯）。上帝既然畀咗盞燈我地，就無理由唔拎住佢走入黑夜吧。

文：Jon