有班中學雞玩食物 陪伴嘅神父點應對？

一間快餐店入面，有個神父陪一班中學生喺度飲飲食食，佢哋當中有個有特殊教育需要（SEN）嘅學生，成日好鍾意撩是鬥非，食淨舊雞胸嘅佢，見呢舊肉嚡熠熠，無食咗落肚嘅雞髀同雞翼咁滑，就想質其他同學食，於是幾個同學你質畀我，我又質返畀你，攞住舊雞胸喺度玩來玩去。

陪佢哋食飯嘅張心銳神父見到，就有少少無名火起：「有無搞錯？咁樣喺度玩食物！你唔食，咁你咪放低囉！你食唔到咪算囉！喺度隊嚟隊去，咁即係點呀？」火起完之後，張神父突然記起，自己啱啱先同班學生講完道，叫佢哋要學識「忍耐」，點知「最唔忍耐嗰個係我」，覺得自己都要反省吓。

成日都話要陪伴有需要嘅人，張神父坦白講，有時每個人都有啲雜質，唔知唔覺就會走咗出嚟，陪伴嘅時候，其實我哋自己都學緊，有時係無答案，或者都解決唔到問題，「不過我喺度，我願意陪佢哋去學。」

張神父前日喺「與香港同行：『在地的福音』分享及祈禱會」分享，佢相信做牧養嘅心態都需要改變，因為講到「牧養」兩個字其實「好高」，「我係牧者，你係羊，我要『牧你』呀嘛。」佢覺得作為牧者，或者比較有經驗嘅兄弟姊妹，面對而家嘅文化，其實都需要調校吓。

文：LikHang