無辜義人被殺，上帝去咗邊？

無辜義人被濫殺時，上帝喺邊？點解唔出手？《聖經》入面咁樣問過嘅，大有人在。所以耶穌提及「由亞伯的血，直至被殺在祭壇與聖所之間的先知撒迦利亞的血」，根據《創世記》，亞伯的血在地底哀訴，要求上帝伸冤，而根據《啟示錄》，「為神的道作見證而被殺的靈魂在祭壇下哀哭」，質問上帝為何遲遲不審判地上的人。睇住耶穌被殺的門徒，心裡應該都有呢個問題吧，只係問完之後，大家仍然咩都唔做，唔知做啲咩，或者做唔到啲咩。

▍ 耶穌之死：你個仔就死喇，上帝你仲唔出手？

本來期望跟老師復興（光復）以色列國的一眾耶穌門徒，發現「自己人」入面有個「反骨仔」，一夜之間老師被捕，隨即被判死刑，想必六神無主。就連當初揚言「老師你去死，我跟你去死！」的彼得，也只敢流連在審判所、刑場附近遠望。當有人問「你係咪識得耶穌？」，他也矢口否認，害怕踩到宗教領袖的「紅線」而被牽連。

福音書記載，耶穌死前問過上帝「為何離棄我」，可能當時門徒也這樣想，如果上帝重視耶穌，為何睜眼「睇住佢死」，不派天使救他下來？

但耶穌沒有質問「點解你唔審判逼害我嗰班人？」反而請求上帝「饒恕佢地，因為佢地唔知自己做緊乜。」耶穌的血，不是控訴，甚至不是要求伸冤。

▍ 殺嬰事件：啲細路死晒喇，上帝你喺邊呀？

耶穌出世時被稱「猶太人的王」，令當時執掌政權的希律王害怕權力被動搖，下令將城內所有兩歲以下的孩童殺盡，「殺錯99個，好過放生1個。」馬利亞同約瑟醒目，聽天使報料，保住耶穌無事，但好多唔知咩事就失去子女的家庭，就哀鴻遍野。「拉結在哭她的兒女，她不肯受安慰，因為他們都不在了。」（馬太福音2:18）

「點解要我地嘅仔女為你死呀？」即使一眾母親知道仔女「為何」被殺，可能仍會咁樣問。還是嬰孩的耶穌，沒能力回應。多年後，他用走上十架的路來回應。

▍ 以斯帖記中的猶太人：我地成個民族畀人清洗喇，上帝你可唔可以出句聲？

據說《以斯帖記》源自歷史事件，猶太人亡國之後，活在波斯統治下，波斯宰相哈曼唔順氣有班以色列人阻頭阻勢，諗住利用佢地嘅宗教做藉口，話佢地「不肯聽從王的命令跪拜自己」，乘機殺晒所有猶太人。如果唔係皇后以斯帖挺身而出，篤爆宰相陰謀，猶太族群就玩完了。

上帝在《以斯帖記》完全沒有出現。我們可以說，上帝祂透過以斯帖拯救以色列人，又可以說，是以斯帖憑自己在朝廷的位置，在權鬥中勝過波斯宰相一籌。

▍ 合理的質問：正義何時得伸張？

身陷苦難，質問上帝「冤屈幾時平反，失去的何時光復」，合情合理。但是看似沉默的上帝，似乎總有祂回應事態的方式，是出乎世人想像的。

文：JC