494年前嘅今日（6月25日），有一個「奧格斯堡議會」（Diet of Augsburg）喺自由城市（而家位於德國）奧格斯堡進行。或者你完全冇聽過呢個議會嘅名，但其實呢場議會對信義宗甚至基督新教都有一定嘅意義，你又知唔知道呢？

1517年馬丁路德開始宗教改革後，政教開始分離，喺1530年嘅奧格斯堡議會入面，當時嘅羅馬皇帝查理五世（Charles V）為咗令不同嘅宗教教派統一，召集咗領土入面唔同想法嘅重要政治同宗教人物，喺呢個會上面解釋佢哋嘅宗教信念。

其中，宗教改革家腓力墨蘭頓（Philipp Melanchthon）所寫嘅《奧格斯堡信條》（Augsburg Confession）就解釋咗馬丁路德（Martin Luther）嘅信念，亦都奠定咗信義宗嘅基本教義，來為之後基督新教嘅發展鋪路。

《奧格斯堡信條》包含28篇文章，講述馬丁路德所持守嘅核心信仰理念，例如第4條講因信稱義、第7條講教會、第18條講自由意志等；亦有提出對羅馬教會某啲做法嘅唔認同，以及改革嘅需要，例如第28條講教會嘅權力，主教嘅權柄唔應該同政府嘅權力混為一談，主教權力本質上唔應該包含執行地上政府嘅職權，亦即係「政教分離」。

雖然最後《奧格斯堡信條》不獲查理五世同大多數人接受，但佢本身依然代表住宗教改革嘅一個小小里程碑，當中講述嘅教義同建立嘅論點到而家依然清晰完善。而路德宗往後持續同羅馬教會辯駁對峙，最終於1555年簽訂《奧格斯堡和約》（Peace of Augsburg），確立咗德意志諸侯國嘅新教同羅馬天主教嘅共存。

嚟到現代，奧格斯堡呢個地方依然保留咗唔少當年宗教改革留低嘅足跡。例如聖安娜教堂展示咗各式各樣關於馬丁路德嘅文物，甚至當年《奧格斯堡信條》嘅文件，都依然被保留喺教堂裡面；而金碧輝煌嘅市政廳就正係當年簽訂《奧格斯堡和約》嘅地方。大家放暑假如果會去歐洲旅行，不妨計劃到訪參觀一下！

文：Arthur