香港人見到「神」字會諗起咩？

見到個「神」字，一般人會諗起咩？噚日提到嘅「Small world of words」廣東話研究中，原來都有問到「神」嘅聯想詞，除咗「女神」同「鬼」之外，基本上都係同基督教有關，好似「耶穌」、「天父」、「聖經」、「基督」、「上帝」等，唔見有其他宗教嘅神。似乎就算參加者未必係基督徒，但見到個「神」字都會聯想到基督教。

至於講漢語（普通話）嘅，雖然都有人聯想到「耶穌」同「上帝」，但關於基督教嘅聯想詞就少好多，反而會多咗「神明」、「神仙」、「神話」，亦有同宗教無關嘅「神經」、「神秘」、「神奇」。

負責研究嘅語言學者劉擇明就解釋，一個詞語表達咩概念係一件好流動嘅事，受到好多因素影響，並唔係話個字原本點解，就全世界一千年後都會照跟。佢提到，語言嘅變化好多時唔係一個人可以控制，但有時候如果有一個群體，好鍾意用一個叫法，然後不斷地用，只要用嘅人數夠多，又夠堅持，久而久之呢個叫法係會跑出，推郁成個社會嘅用法。

點解就算唔信基督教，見到「神」字都會諗起耶穌？劉擇明就話，無論你相唔相信一樣嘢，只要你聽得夠多，都自然會記住咗。佢舉另一個例子，香港人無論政治立場係點，見到「愛國者」自然諗起「治港」、見到「由治」自然諗起「及興」，聯想呢樣嘢係無得呃，你相唔相信、支唔支持、鍾唔鍾意都好，總之兩個詞係有關，你就會諗起。

劉擇明話，好多時詞語本身係泛稱，好似不同嘅神都可以叫「神」，又好似不同嘅黨都可以叫「黨」，但如果有啲人堅持某個就係default，甚至覺得神只得一個，所以叫自己相信嘅神，或者自己鍾意嘅黨時，就堅持唔加任何修飾語，咁佢下次見到有人用呢個字做泛稱時，可能就反而會覺得人哋要講得好清楚，「因為呢個字default就係我個神，唔係其他宗教嘅神。」

上述係「神」由一個普通概念，語意範圍被收窄，變成指向某個更特定概念嘅過程，劉擇明話呢個喺語言變化上係好常見，而調返轉擴闊語意範圍都有可能的，就好似喺一個未接觸過其他宗教嘅地方，「神」呢個字可能只係指自己個神，但假設呢個地方突然接觸到好多個外族，而佢哋各自又有自己嘅信仰，呢個地方嘅人又可能借用「神」呢個概念，去稱呼人哋宗教嘅神。

文：LH