羡慕、憂慮、懨悶、尷尬，邊個聖經人物有呢啲情緒呢？

尋日我地講到，《玩轉腦朋友2》的新「腦友」，唔知耶穌有無經歷過，但其他聖經人物呢？可能就經常遇見「羡慕」(envy)、「憂慮」(anxiety)、「懨悶」(ennui)、「尷尬」(embarrassed)呢啲情緒，真係hello darkness my old friend。該隱嫉妒亞伯，亞伯拉罕上山準備殺以撒時在沉默中焦慮，以利亞逃避追兵時在山洞懨悶，摩西阻止族人自相殘殺時，被質疑的尷尬⋯⋯仲有好多，不能盡錄，你又諗起邊個？

Envy原解嫉妒。聖經最早的嫉妒，應該就係該隱妒忌細佬亞伯：「點解佢獻祭上帝悅納，我獻嗰啲上帝就唔悅納，唔通我做錯啲咩，唔夠佢『屬靈』，所以討唔到上帝歡心？」究竟上帝係咪偏心，亞伯係咪招積夾抵死？但上帝無話唔悅納該隱獻祭，係因為佢做錯啲咩，罪只係「伏在門前」，尚未入心。或者上帝唔悅納的，剩係「獻祭換上帝歡心」嘅交易心態？唔悅納，其實係邀請該隱更深刻咁認識上帝？好難講，不過該隱之罪，似乎不在獻祭心態，而在起殺意，執刀下手。於是亞伯喺故事入面始終被滅聲，正如法國學者以祿Jacques Ellul《存在的理由》一書所說，「亞伯」的希伯來文跟「虛空」相近，沒有理由就被殺，無機會講嘢就突然被掃進死亡迷霧。

Anxiety焦慮，迷路不知身在何處，前無去路，後無退路，不斷逼自己前進卻像在無間地獄原地踏步。同樣是獻祭，亞伯拉罕帶以撒上山時，心境係點？無人知，聖經無講，但如果佢唔係盲信到失心瘋，亞伯拉罕應該彷徨失措吧。點解上帝賜我兒子，又忽然要求我殺咗佢？無理由吧，佢明明唔係要信徒獻人祭嘅異邦神明⋯⋯而問出「獻祭羊羔喺邊」的以撒，一定估到阿爸想殺自己，又落唔到手，佢嘅心情又會係點⋯⋯

Ennui突然覺得世界無意義，自己無價值，活唔到落去。以利亞發完神威，煽動人民殺晒啲巴力先知，點知隨即畀耶洗別、亞哈追殺，呢個時候無人肯企出嚟做佢擋箭牌。於是出走。更準確嚟講係「逃走」，唔知跑去邊，但一定唔可以留低。跑足成日，虛脫於是挨住一棵樹發牢騷：我以為自己比祖先「屬靈」，但原來差無幾，咁上帝你不如攞我命啦。鸁到開巷，躊躇滿志想復興一神教，點知突然得返一條友唔知喺曠野做緊啲乜，一定好鬱悶。

人幾時會尷尬？發現自己格格不入嗰時。摩西含住埃及金鎖匙出世，但又想幫為奴的族人出頭。見到有條埃及友欺負同胞，仲唔郁手？「解救」族人之後，心諗以色列人應該會聽我支笛，點知見到以色列人內鬥，摩西勸交，卻被質問，憑咩咁做，是咪覺得自己好巴閉，有權打死埋佢地。摩西突然發覺自己「埃及身份」同「以色列血緣」的格格不入，而尷尬。唔想返去埃及皇室，又去唔到以色列貧民窟，就逃去曠野（又係曠野），娶老婆生仔，養羊過日子。

電影嘅新「腦友」，喺聖經入面似乎係「屬靈低谷或黑夜」嘅狀態，離罪惡僅一線之差。但陰間深處，最不預期有上帝的荒山野嶺，卻最有可能偶遇祂的顯現，例如在摩西面前燒著的荊棘。所以，耶穌話佢嚟唔係同義人一齊，而係同罪人一齊飲飲食食，大笑大喊。

你又有無諗起邊個聖經人物，同呢啲新「腦友」係打足成世交道的「老友」呢？

文：JC