呢幾日社交平台上面好多人share自己「情緒主角測試」嘅結果，你又有無玩呢？《玩轉腦朋友》第二集7月上映，除咗第一集出場的阿樂、阿愁、阿驚、阿憎同阿燥之外，原來仲多咗阿焦、阿羡、阿厭同阿尷。

樂、愁、驚、憎、燥，英文係joy, sadness, fear, disgust, anger。Disgust更貼切應該係厭惡，而唔係「憎恨」，anger應該係憤怒，而唔只係「燥底」。新朋友焦、羡、厭、尷，其實剩係得「尷」先至可以一睇就明，前三個腦友anxiety, envy, ennui應該係憂、慕、悶。雖然anxiety可以解焦慮症，但焦慮症係精神病嘛，憂慮卻是人之常「情」。Envy喺《鋼之煉金術師》更係人造人之一！亦係天主教「七宗罪」之一，正解係「嫉妒」，唔能夠自愛，永遠想成為別人，但「慕」就唔同嘞，傾慕、仰慕，可以係要求自己變得更好呢～Ennui仲巴閉，係法文嚟，解做「懨悶」，面對荒謬人間地獄，無力回天，於是鬱鬱寡歡、無所事事，既倦怠又想躺平，唔返工唔出街，就當係對抗世界。

睇唔睇戲都係其次，小編就唔特別鍾意套戲的設定，「夢工場」太悶、「遺忘深淵」太淺、「思維列車」太空洞，但「情緒」又不妨諗多啲，例如，耶穌經歷過套戲入面嘅情緒嗎？

Anger：耶穌發過怒。佢有次入聖殿，見到啲人擺檔賣羊、賣鴿「獻祭用」，火都嚟埋，動手反枱鬧班人，神嘅殿係用嚟禱告，為乜事變咗賊窩？

Sadness：當拉撒路死咗，耶穌嚟到佢屋企，見到拉撒路家姐馬利亞喊到豬頭咁，鄉親父老又跟住喊埋一份，佢都莫名流淚，有「愁」過。

Fear：就嚟要上十字架，耶穌徹夜喺黑夜山上禱告，同天父講，如果你肯，就拎走個苦杯啦。要走最後一段路，被上帝遺忘離棄，耶穌有害怕過。

Disgust：當佢仲喺人世傳道，耶穌都怨過，當今呢個唔信嘅世代，佢要忍到幾時？厭惡感，耶穌都有過。

Joy：但「樂」呢？路加福音有記載，當成班門徒傳完道返嚟，個個興奮得朝氣勃勃、意氣風發，耶穌受聖靈感動，而歡樂。

至於新的「腦朋友」，就難啲講耶穌有無經歷過，但唔代表呢啲情緒一定唔係好嘢。對人生焦慮可以令人躁急，騰嚟騰去而原地踏步，但只要慢落嚟，同一份「憂」卻可以催生一個人的成長，甚至是一飛衝天的成長。「羡慕」如果連住「妒忌恨」，當然只係弱者自卑心態，唔抵得人地比自己活得自在，甚至想拉佢落嚟，陪自己一齊墮落，但只要將對人地嘅恨意，轉向對自己嘅愛意，厭惡自己墮落同時渴望自己奮進，咁「羡慕」更好的人（耶穌）又有乜問題！「尷」雖然係唔夠膽做自己，但有個相似的詞「羞恥」，唔單只尷，直頭覺得做錯嘢，但如果唔係因為人地話你就羞愧，而係自己發現做錯事，咁呢份恥感，其實就係改過之力。就算係悶，個心反鎖在厚實門後，似乎係困境死局，但「悶」其實就係「不滿」現狀，想打開道門透氣，倒出廢料，吸納養分。

概括嚟講，第2集嘅新腦友，都係一啲察覺自己身處罪惡險境的情緒，如果太強烈，可以反被罪惡所利用，自暴自棄，自毀、自殺，但畀啲時間，就可以推動一個罪人改過。耶穌唔係罪人，好難話佢經歷過呢啲情緒，但佢唔係「出污泥而不染」，而係深入罪惡淵藪，去最邊緣嘅人屋企食飯，所以，更難話耶穌唔明呢啲情緒，畢竟佢係為咗解放自己困住自己嘅「罪人」而嚟，而唔係為咗指出邊啲人係「罪人」。

咁你又覺得，耶穌在世時，最常感到嘅情緒，係邊樣呢？

文：JC