飲一碗湯，足以輸身家？

飲一碗湯，足以輸身家？當人軟弱嘅時候，就特別容易中招。話說喺好耐好耐以前，就有個細佬趁住哥哥好攰好口渴，用佢煲嘅一碗紅豆湯，成功換取「長子名份」，繼承老豆嘅產業。

煲湯嘅係細佬Jacob，飲湯嘅係大佬Esau。兩兄弟雖然係孖生，但性情好唔同，大佬成日落田打獵，細佬比較文靜成日留喺屋企。老豆Isaac鍾意食野味就鍾意大佬，阿媽Rebecca就鍾意痴家嘅細佬多啲。

有一日，大佬Esau打完獵返到屋企，身水身汗又攰又渴，見到細佬Jacob煲緊紅豆湯，就求細佬畀碗佢飲。點知細佬竟然話：「想飲湯？你賣你個長子名分畀我囉。」所謂長子名分，唔只係邊個大邊個細咁簡單，佢哋老豆Isaac就係因為有呢個名分，成為一家之主兼且承受雙倍產業，仲有「繁衍眾多、成為大國」嘅祝福添。

大佬Esau唔知係咪餓得滯，竟然口輕輕話：「我都就嚟死，要個長子名分有咩用？」細佬Jacob見大佬咁順攤，即刻打蛇隨棍上：「嗱一係你而家對住我發誓。」大佬又竟然真係誓神劈願將長子名分賣畀細佬，細佬就將紅豆湯同餅畀咗大佬。後來，細佬仲真係喺阿媽Rebecca嘅協助下，得到老豆Isaac臨終前嘅祝福。

故事記載於聖經《創世記》，作者對呢件事嘅總結，就係Esau輕看咗佢長子嘅名分。去到好多好多年後，仲有人拎返呢件事出來講，《希伯來書》作者就直指Esau「貪戀世俗」，因為少少食物賣咗長子名分，但後來又想承受老豆嘅祝福喎。只不過一切都已經太遲，即使喊晒口求老豆，但都無辦法令佢回心轉意啦。

文：LH