《年少日記》導演卓亦謙：與其教人做嘢不如活在當下

拍過《年少日記》，導演卓亦謙在眾人眼中，彷彿成為學童自殺問題專家，有人在講座上問他對老師和家長有甚麼建議、有人私訊向他分享自己的童年陰影。他卻自言，拍戲初衷只是說出朋友輕生的故事，根本沒想那麼多，上映後排山倒海的期望，其實重得令他崩潰，他卻難得的能夠保持清醒，知道電影並非要解決問題，而是能夠帶出討論；與其「教人做嘢」，不如好好活在當下。

▍  拍戲打開討論就足夠

早前的S+高峰會暨博覽中，卓亦謙分享，2015年他已經有《年少日記》劇本的意念，但當時覺得「唔好搞」，一來覺得沒人會有興趣，二來也害怕引起模仿效應。可是，後來他從新聞中發現，學童自殺的數字不跌反升，「原來世界無變不特止，仲越來越衰。」他突然覺得：「唔係喎，唔講先至可能係咁耐以來，個問題都係會繼續（的原因）。」

透過電影藝術，又可以解決學童自殺的問題嗎？卓亦謙坦言：「我覺得從來都解決唔到，但係佢可以提出一啲討論。我覺得佢係開咗一個topic，觀眾睇完之後，邊度我拍得唔好，你返去鬧下，你都會討論一下呢件事。」他指韓國一齣講述孤兒院院長性侵孩子的電影《溶爐》，上映後案件是有翻案，但這是極少數電影在現實中「做到啲嘢」的例子。

▍  與其教人應該點做，好好食餐飯好過啦

在《年少日記》上映以來，卓亦謙出席過很多場分享會，一次他被問到有甚麼方法可以建議老師和家長，他的第一個反應是：「吓？我本身無諗咁多嘢。」他的社交媒體也收到很多訊息，是觀眾講自己的童年陰影、自己即將要做老師或社工等，對卓亦謙來說，這些訊息卻「重到我崩潰」，因為他沒有相關專業，自覺「講咩都係死梗」，只能夠回應：「希望你講咗出嚟舒服啲。」

面對這種期望，卓亦謙心情複雜，一方面感到對方好像多年沒機會抒發，可能很期望可以得到一個答案，另一方面他卻真的沒法提供答案：「唔通你畀佢個撒瑪利亞電話佢咩？只可以同佢講take care。但我同一個講take care，同第二個講take care，我自己都覺得好差。」

《年少日記》其中一幕，是飾演父親的鄭中基在醫院與兒子相擁，不久父親與世長辭。卓亦謙說兩父子之間有心結，十多年來沒真正對話，到那一刻大家都很崩潰。他想像，如果父親翌日病情好轉，兩父子之間的隔閡仍然會存在，「只不過喺嗰個時刻，佢哋兩個嘅心理都需要出口，而對方係世界上唯一知道、掛住同一件事嘅人咁解。發生咗嘅事情無得改變，但如果有一個人傾下計、互相擁抱，係已經好好多。」

「香港人好鍾意教人做嘢：你應該點點點、你唔讀書第時就揸兜、而家飲罐可樂就會痴肥。好多呢啲咁嘅嘢。好厭好煩，成日講啲我唔知嘅嘢，講嚟做乜呢？不如當下好好食餐飯好過啦。」

文：LH