上週講到教會聽到嘅難聽「安慰」說話，見到大家反應都好熱烈，甚至都有唔同睇法。有讀者覺得教會弟兄姊妹都無受過專業訓練，見到身邊人遇到唔開心嘅事，都想對方好，但係唔識點做，唔係個個有輔導背景，做弟兄姊妹以至做朋友，唔駛考牌嘅。有讀者就覺得，既然唔識回應，可以同佢一齊祈禱交畀神，而嗰啲難聽說話，有少少同理心都唔可能講出口，講嘅人係無用心聆聽同看待對方，同識唔識安慰係兩回事。

另一位讀者都覺得，神都會看重我哋人同人之間嘅關係，同人相處係要學一世嘅課題，如果肯為別人思考多步先再講野，終有一日都會學得識點樣安慰人。究竟大家覺得點樣先係好嘅安慰呢？我哋喺Threads問過讀者，同大家分享一啲回覆：

-有人一齊喊
-陪伴
-你仲有我地/有咩要幫手出聲
-我喺度
-被聆聽、被明白、被接納
-陪伴，唔需要講任何嘢
-陪伴、聆聽、重覆我嘅觀點
-陪佢做「唔啦更」嘅嘢

除咗上述嘅例子，都讀者有講到一啲原則，有人覺得其實好多時受苦嘅人唔係求建議，只係想被傾聽被理解。睇完咁多人嘅分享，小編留意到上面出現頻率最高嘅，其實就係一個「陪」字，其次就係一個「聽」字。至於「講」，似乎唔係咁重要。

學點樣講可能唔容易，但學下陪多啲、聽多啲、講少啲，可能都係一個幾好嘅方向，正如其中一位讀者嘅留言：「有時更重要可能唔係安慰嗰句說話，而係佢好想陪伴你、安慰你嗰個心。」

文：LH