廿幾年前香港都有基督徒nightclub

尋日美國Gen Z後生仔開基督徒nightclub嘅post引起唔少討論，雖然無酒、無煙，但有讀者表示接受唔到，亦有讀者覺得其實都係團契活動咁啫。不過，原來唔同年代、唔同地方嘅基督徒群體都有類似嘗試~

▍ 香港：喺號稱亞洲最大嘅348 Disco搞福音酒吧

現已退休的羅錫為牧師話，廿幾年前佢同幾個牧師傳道，包括倪貢明牧師、倪翰生（金星）、陳慎芝、莫樹堅牧師、吉中鳴等等自稱「福音bartenders」，一早已經做過呢件事。

佢地當時借用社團大佬洪漢義（Teddy哥）喺油麻地彌敦道348號經營、號稱亞洲最大嘅348 Disco，改造成「福音酒吧」，對象係邊青、夜青，免費招待佢地。羅錫為形容，「音響band怦怦聲！」，Teddy哥後來都信咗主。

羅錫為話，當時佢地呢個酒吧福音事工係由Teddy哥贊助，不過佢地都係唔serve酒的。每逢禮拜尾，佢地就會做一晚福音酒吧，由幾位牧者輪流得閒就去幫手，維持咗差唔多一年時間。

▍ 台灣：The Hope向夜店借場搞崇拜

講返近少少嘅年代，喺台灣幾出名、唔少香港信徒都有網上聽佢地崇拜嘅教會The Hope，一開始其實都係喺台北夜店OMNI聚會。

The Hope嘅主任牧師萬力豪曾經喺美國嘅夜店向人傳福音。The Hope由2019年1月開始，開堂半年後主日聚會人數已經超過700人，大部份係大學生同職青。萬力豪曾經同媒體講：「The Hope不是為了基督徒而存在，而是為了那些還沒有信主的人存在！」

開堂兩年後，去到2021年，因為教會太多人，連夜店空間都唔夠用，所以先搬去而家嘅新地方聚會。

▍ 日本：「牧師Bar」接觸唔會去教會嘅人

喺日本，有位牧師中村透（Nakamura Toru），近年亦喺東京開咗「牧師Bar」，每個星期日晚都會開放，其間會有兩次信息分享。

中村透好想接觸唔去教會嘅人、默默聆聽佢地嘅煩惱，用基督教嘅理念去回應。

佢又話，成日都有客人問到赦罪嘅問題，好想知道係咪犯過任何罪都會被原諒。

文：IC