當得返自己一個人嘅時候，你鍾意做啲咩？有人話會喺安全嘅地方裸體，有人話會開住門去廁所，又有人話會打乞嚏唔掩口，總之就可以唔駛顧儀態，好似都幾爽。創作人DDED仲話，平時多數戴帽，一來懶得打理，二來髮線向上移，所以一個人嘅時候，可以將額頭解放出嚟曬金光，聽講可促進頭髮生長，有助長壽健康！

之前搞過「我想告訴你，其實我並不快樂」展覽嘅Not a Gallery，新嘅展覽題目係「單獨對話：寂靜無聲的時代」，收集大家一個人嘅時候會做嘅事。唔少答案都同貓有關，好似蘇可程就話最享受攤喺張床度打開playlist，隨機播放，再同佢隻貓一齊瞓晏覺。又有人話會邊洗碗邊亂跳舞，對住貓貓們唱歌。

好多人都鍾意一個人睇戲，藝術家飛天豬就話會睇動漫或者韓劇，用浪漫騰空返腦袋嘅空間，而佢剛剛睇完Spy Family嘅電視加電影。都有人話，唔鍾意同人一齊睇戲，尤其係易整喊佢嘅，因為自己大喊最舒服，唔駛驚影響到氣氛而壓抑情緒。

由展覽中都可以窺探一啲名人不為人知嘅一面，好似試當真嘅許賢自己一個時原來會的波，演員盧鎮業就會執屋，而漫畫家謝曬皮就會自言自語，講英文同日文，但係佢唔識日文。「匡哥」陳裕匡就會試下靜靜地坐喺度，盡量唔比自己諗嘢，比個腦抖抖。有時個腦會出現一啲念頭，佢會盡力將佢哋拉走，雖然好難做到，但做到一陣都好。

展覽策展人、藝術治療師梁靜韻就話，疫情令大家多咗自己一個人嘅經驗，其實孤獨同寂寞係意念嘅一瞬間轉變，人寂寞時會覺得被遺棄，但孤獨卻係人嘅必經階段，因為人或多或少都有啲時間要自己一個。佢話，而家所謂開關復常，社交媒體仲越來越多，碌完IG仲要睇threads，老一輩用FB後生嘅用埋BeReal，好似成日同人connect住，但其實係好驚被遺忘、好驚無同人連結嘅感覺。

梁靜韻強調，獨處嘅時間係心理健康嘅重要元素，獨處時我哋先有空間諗吓，我哋嘅情緒其實係點樣。佢解釋，如果我哋無屬於自己嘅時間，好易概括（generalize）咗自己嘅情緒，因為我哋無時間去沉澱，只係不斷返工返學、碌電話、睇新聞，關心好多身邊嘅大事小事，到瞓覺嘅時候覺得好攰，係純粹身體疲累，定係心很累？心神嘅攰係咩？係不停同人講嘢到好攰，定係好攰去迎合其他人嘅期望？

「我哋不停往外嘅時候，我哋有無一啲時間，係將電筒唔只係照向外面，而係將電筒照向自己內心？」

文：LH