兩晚前的旺角街頭，有人用木板車托住一盒盒餸，從三餸飯的外賣食店，顛簸地拐彎，駛向煙廠街。住在旺角東火車站、豉油街隧道旁的幾位無家的街坊，在三兩男女的陪同下，走向同一處地方，一齊食餐團年飯、睇套戲、傾幾句閒偈。

煙廠街有間Pavilion Cafe（良亭雅敍），是中國基督徒傳道會中心堂開設的場所，Cafe除了開門做生意，每個月都招募義工，落區探訪附近的無家街坊。上個中秋Cafe就邀請了無家者上來堂會食咗餐飯，而今個農曆新年，是他們第二次擺設筵席，招待願意前來的街友。

▍   無分彼此的筵席

「希望嚟到的人，不論係無家者，定係義工，都唔使客氣咁enjoy餐飯，一齊團年。」召集義工的Cafe負責人文豐解釋，希望飯桌前的大家是無分彼此的街坊，甚至放下「無家者」與「義工」的施受角色，讓「關懷貧窮」不只是「任務」，更成為家常便飯。

這場團年飯，有4個街友出席。文豐本來預算至少有10人，前一天落區時，有另外一班街友說很想赴會，但最終抱恙無法前來。本來只有2個街坊來，文豐決定再到豉油街隧道一趟，遇見兩個姨姨、叔叔。「佢地食緊飯盒，但聽到有飯食，個姨姨記得上次嚟過，就同叔叔講：唔好食喇！上面好多餸㗎，一齊上去啦。」有人記得Cafe的飯餸飽肚，仍是令人滿足的。

三杯雞、西蘭花、咕嚕肉、南瓜、菜心、水蛋，簡單的餸菜，卻既讓無家者食完一碗又一碗，也能遷就其中「唔咬得硬嘢」的一個叔叔。之後，義工還煮了一桶薑汁湯圓，很暖胃。食完飯，大家仲一齊睇電影，較年長的婆婆說「聽唔明你地笑咩」，但也有叔叔看得入神，義工也同街友有傾有講，例如問那位婆婆聽唔明啲咩，「不如我同你講吓」。

▍   畀杯熱朱街坊飲

人數不如預期，有義工表示失望，也有人看見剩下餸菜倒入垃圾筒，覺得浪費、心痛。文豐卻說「筵席預備咗無人嚟，嘥晒啲嘢食，上帝其實都好心痛。但幾多人嚟都唔緊要，最緊要係我地仍然同街坊做鄰舍。」

何況，這次成事，文豐說上帝開了他的眼界。他本身沒打算開這場團年飯，8日前一位姊妹提出這個建議，他覺得太急，但跟堂會長執傾完，他們竟然又支持。預備活動，需要一筆錢，宣傳第一日只收到$100，本來打算自己埋單，因為不想每次都要教會出錢，但沒多久，就收到另一筆捐獻，正是需要的金額，後來又有另一筆幾乎同額的捐款，以至他要跟其他想支持的朋友說，「夠喇，有餘了。」他承認，對弟兄姊妹捐款沒太大信心，但今次神如此快就回應說：「你想為我做嘢，咁我就畀夠用的恩典你。」

他也感謝每個幫忙的義工，不但陪伴無家者，事後更做埋執頭執尾的後勤工作，例如洗碗、搬枱等。如果自己一個做，他說可能12點才做完，因為他預計是自己一個洗晒啲碗。第一次來的某些義工說，這次經驗很深刻，例如看見姊妹帶動場面氣氛，看見無家者不過是街坊。

「聖經叫我地畀杯涼水弟兄，咁我地咪畀杯熱朱囉。」文豐說，探訪義工有些是樓下教會的信徒，但更多是網上看見宣傳而來的朋友。「其實好多人想做，但唔係間間教會都有得做，咁我地就招聚呢班有心的人，每個月揾個星期六，落街揾吓班街坊。」

文：JC