張滿源改詞《祝福你》變教會歌

「基督裡，共唱慶新歲，信靠主滿生趣。主得勝，贈你這一句，愁煩悶氣消除。」見到呢幾句歌詞，會唔會覺得「有聲」？你無諗錯，呢幾句真係《祝福你》嘅改詞版《共唱慶新歲》，由基督徒藝人張滿源改編。

張滿源同小編分享，見過唔少人將賀年歌改做教會版，就好似《迎春花》都有人改過，不過佢覺得呢首歌「太富有民族氣色」，對香港信徒來講有少少距離。佢就比較鍾意甄燕鳴由《財神到》改成嘅《神來到》，話覺得呢首歌「好香港」，加上係許冠傑原作，耳熟能詳，係好好嘅選擇。

至於點解要改多首歌，張滿源就話，教會都需要喺新年唱下賀年歌，希望可以畀教會有多個選擇，首詞係佢上年改嘅，當時正值《祝福你》嘅作曲人顧嘉煇過身，佢覺得呢首歌好代表香港嗰個年代，係香港人好熟悉嘅歌，方便大家去唱。

「今年為主打拼電要叉」、「主福蔭，入到你屋企」，張滿源分享，改詞時刻意加入廣東話俚語，希望首歌除咗同信仰有關，都同本地文化同語言相通。

新推出嘅「2024版」改咗少少，就好似原詞「你我跨過崎嶇」，改咗做「信靠主滿生趣」，佢話因為經過2023年，發現就算信耶穌嘅，其實都唔係好跨得過，但耶穌仍然與我哋同在，希望用「生趣」會令唱嘅人感受到，在困難中仍有生趣，係有一份隱藏嘅盼望。

文：LH

《共唱慶新歲》( 祝福你 2024教會版）
原曲：祝福你
作曲：顧嘉煇
歌詞改編：張滿源Kenneth

基督裡，共唱慶新歲，
信靠主滿生趣，
主得勝，贈你這一句，
愁煩悶氣消除。

基督裡，步履更爽脆，
處處走進應許，
分享愛，願意豁出去，
神同在永相隨。

今年為主打拼電要叉，
獎賞預咗俾你絕冇假，
恩典傾瀉在秒秒降下，
高歌Hallelujah。

基督裡，健壯滿朝氣，
讚美中再起飛，
主福蔭，入到你屋企，
神行事太出奇，
新春添喜氣，豐足加給你，
萬有主念記。