留一天與你喘息 上山攤唞下

趁住週末假日，小編去咗突破青年村嘅open day。今次活動好多，有市集、音樂表演等等，感覺好chill。大家可以坐喺草地攤唞下，有表演者即場唱咗Ian嘅〈#留一天與你喘息〉，感覺好match呢度個氛圍。

再行遠少少，chapel隔離有啲橙色帳篷，原來係「心之旅程」嘅默想活動，畀人安靜唞唞，喺帳篷回想下兒時片段；之後沿小路行幾級梯級落去，有間小房間又有啲畫可以做默觀。最後就有幅耶穌平靜風浪嘅壁畫，畀人去思考返喺今日嘅香港，我哋自己嘅心靈狀態係點。喺呢個步伐急促嘅香港，「心之旅程」呢幾站令人覺得好舒服，原來平時都太忙，好耐冇放慢腳步喇。

完咗成個旅程之後，仲有得去茶室飲啖茶，並且拎塊石作為旅程的紀念品。

返返去大草地嗰邊，隔離有個插畫展，有廿幾位插畫師用一啲句子創作咗啲畫作，勉勵香港人。睇完之後都覺得：原來有好多人一齊喺呢世界努力緊，我哋都唔係自己一個。畫展亦都有個留言區域，畀啲人同青年人講嘢，互相勉勵。比較得意嘅係，有年輕人話希望退休；亦有人希望繼續做自己。有人都鼓勵後生仔把握機會試新嘢。

上去一樓亦有幾個展覽，其中阿強創作嘅「世界末日不專業求生記」展覽，佢講到每個人都會面對世界末日級嘅煩惱，大家總會想逃避。既然係咁，不如暫時忘記一下眼前難題先啦。佢都提醒咗小編，雖然有十萬樣嘢要做，但與其擔心，不如都係唞一唞先啦～

今日突破青年村都仲會開放，想唞一唞、chill吓嘅，不妨上去行吓，放鬆吓心情～

「微光之約Here We Shine」突破青年村展現日
日期：2月24至25日
時間：11am-6pm
地點：沙田亞公角山路33號

文：DM

（部份相片由突破機構提供）