今夕適逢元宵佳節，雖然街上已沒有闌珊燈火的搖曳光影，但有情之人想遇上伴侶的心願，也還是有的。就算你唔係基督徒，可能都從信徒朋友口中聽講過，香港教會流行一種教導，「基督徒揾另一半，一定都要係基督徒」。早前，基督教宣道會香港區聯會就邀請咗幾位嚟自唔同堂會的青年男女，喺佢地YouTube頻道閒談，點解就算佢地想揾基督徒伴侶，都咁難喺團契入面揾到。

Kawa觀察，返團契啲男仔，普遍畀人的感覺係「無主見」、「儀容不整」，甚至鬚都唔剃，牙都唔刷。她覺得一個好的基督徒，應該可以慢慢培養最起碼的自理能力。正如同場其他人所說，是自律(self-discipline)，也是「相由心生」。Timothy卻認為，有啲弟兄滿面鬍鬚，心地善良，又好愛主，點解姊妹就將他們排除在外呢？另一位姊妹Hosanna答話，又唔係特登列出一個清單，滿面鬚根就不了，只係純粹好自然「唔會考慮」。

Kawa又留意，身邊唔少姊妹，雖然想揾有共同信仰的伴侶，但唔想喺團契揾。可能係由細識到大，無火花、無化學作用，又可能顧慮「如果散咗，係咪是但一個無得留低」，或者怕團友未必有惡意的閒言閒語。

Kawa仲有另一個見解，就係團契時間通常見到弟兄姊妹「最低谷」嗰面，成日呻返工幾慘，屋企幾多問題，好難「覺得吸引」。反而係跨團契的服侍，例如去短宣，容易無意間看見對方的工作能力，甚至魅力。

Timothy笑說，「咁係咪要喺團契度設立多啲事奉崗位呢？」

你又點睇呢個問題？想唔想喺團契度搵另一半同點解呢？

文：JC