之前同大家分享浸大團契嘅食字文化，一日之內就收到唔少朋友分享佢哋嘅「餐單」，有啲小編都好鍾意。讀者Vicky話，佢哋每年放榜前都「撐你就祈」，祈完之後應該都會去「飯聚」，因為佢話佢團契成日「飯聚」喎。另一位讀者Ka就提議過一個名：「返初」，意思係尋回對上帝嘅初心、信仰嘅根本。

個post仲引咗班老鬼出來話當年，有浸大團契嘅老鬼就話，佢哋嘅食字傳統由來已久，佢仲記得大概2007年參加過一個週會叫「八福逗父」，係查耶穌登山寶訓講嘅「八福」嘅，至於「逗父」，帶查經嗰位解題就話係「逗」天「父」開心咁解。嘩！都17年前嘅事，呢位老鬼仲記得，證明食字都幾有效。

呢位老鬼仲話，覺得浸大團契近年係越食越精彩，好似今年見到嘅「傳宗‧接待」真係無得頂，呢個四字詞語乜嘢年紀嘅人都聽過，但佢食左字之後，一樣係一睇就明，係講傳福音、講接待他人。

睇嚟食字嘅嘢，歷久不衰，但又青出於藍，相信大家嘅創意，總會有好多發揮空間。

你有無諗過/見過有趣嘅食字？歡迎DM畀我哋。

文：LH