食字，無處不在。青少年活動總係見到「teen」、長者活動成日見到「耆」，睇到反白眼未？最近小編唔覺意碌到，香港浸會大學基督徒學生團契 @hkbucsu 嘅週會，幾乎個個週會名都玩食字，就連全年主題都係食字：「耶果真多兵」，睇完明啲又唔明啲咁，都幾得意。今次搵咗佢哋嘅職員傾下計，問下佢哋平時鍾意食啲乜。

浸大團契內務副主席Priscilla就係其中一位食字能手，佢話食字主要係想令主題有吸引力，例如一個周會係想講「罪」，如果主題係「一起來探討聖經中的罪吧！」就算本身活動好有趣味，人哋見到都會覺得「我平時教會都係聽呢啲啦！」如果個週會名特別啲，宣傳時會令人印象深刻啲之餘，都可能會想知道唔同咗嘅字係想表達咩意思，提升佢哋嘅興趣。

負責靈修部嘅Priscilla之前都諗過一個週會名「祈樂比O」，「我哋真係扮奇諾比奧，扮菇」，而且仲要四個字都有意思！週會係想同團友講「祈」禱嘅重要性，要「樂」於祈禱，交託「比」神，而且態度要順服（Obey）。喺週會完結時，佢哋先同團友解釋四個字嘅意思，希望令團友記得週會想表達嘅信息。

同樣成日食字嘅浸大團契秘書Samuel就分享，有次想搞個講應對異端嘅講座，希望唔係基督徒嘅同學都嚟參加，於是改咗食字名「受唔受cult？」，仲上咗好多人follow嘅 @on9eatword ，結果都吸引到比平時多嘅同學嚟聽。佢話年輕人都係有食字嘅風氣，而且喺大學入面，大家都比較玩得起，如果係教會嘅活動，佢就未必想食字，「老人家一來就都唔明，二來玩唔起。」

Samuel舉例，之前有個講傳福音嘅週會，想強調傳福音應該要有技巧同理論，唔應該只有感情同情緒，所以叫做「沒有技巧，傳是感情？」個名係串緊sing con唱《記憶棉》個人無技巧得感情，年輕人會知道呢句嘢邊度出嚟，就會食得正；如果對象係長輩，唔知道句嘢邊度嚟，根本就唔明個食字位，就會無癮，「我有咁嘅創意，但你都唔知係咩嚟。」

青少年時期開始返教會嘅，總會參加過個名有「teen路」或者「teen國」嘅教會活動，「點解嗰啲會咁kam呢？因為嗰啲唔係我哋諗㗎嘛！」Samuel覺得，教會同大專團契嘅分別，就係教會活動通常都輪唔到年輕人搞，啲名都唔會係年輕人去諗，但係大專團契嘅活動，就真係由學生主導囉。

你有無諗過/見過有趣嘅食字？歡迎DM畀我哋，等我哋都整返個 #eatwordchristian 系列。

文：LH