話說好耐好耐之前，某啲H城教會，聞「龍」色變，仲驚過年獸，唔通佢地未卜先知，夢見北方有條惡龍想燒盡H城？原來係佢地信奉的《聖經》最尾嗰卷《啟示錄》，將萬惡的魔鬼寫成大龍，所以每逢「見龍」，唔理佢係青龍、恐龍定係飛龍、潛龍，總之你係龍就萬惡。

現今回想，教會恐「龍」呢段故，好似比恐龍還要古老。不過，《啟示錄》你又有無睇過？咁查實呢卷書啟示啲咩？係咪好似上一個龍年2012咁，預言緊邊日世界末日？

▍   777？

《啟示錄》開卷，就係聖徒約翰開眼，見到個樣幾恐怖的耶穌，全身雪白，金睛火眼銅腳，講嘢好似洪水奔騰，仲有把兩刃劍好似條脷咁伸出嚟。就算係聖徒，約翰都即刻嚇到仆低。

但耶穌彎低身，拍約翰膊頭：「唔使驚，你仲要幫我寫信㗎。」原來係寫畀七間教會，啲名唔重要，反正我地都唔知喺邊，你就當係沙田、旺角、大埔、北角、元朗、長洲、油麻地。其中有間出名夠晒暖，唔凍唔熱，唔拖唔水。又有間係喪屍，個樣行得走得，入面枯乾晒。有一間好特別，雖然忍得、捱得，卻迷失咗初心，唔知蕩咗去邊。

約翰記低耶穌講咩之後，就係著名的「三條七」：七印、七號、七碗。唔係啲咩正嘢，而係上帝憤怒之審判，一場又一場災難，喊苦喊煞，人間地獄。

▍   受苦的見證人

夾喺七印中間，有兩場敬拜，一個在天，一個在地。第七號之前，有兩條友著住麻衣出嚟，在街頭街尾傳道，但最後畀人盯實、殺死，棄屍街頭示眾。

與其話《啟示錄》講緊某個未發生的歷史事件，不如話卷書呈現基督門徒活在世界必須承擔的命途。無須用「信唔信」劃分人類，唔信就不斷墮落，信就被歧視。只不過，痛苦都有分作繭自縛，以及連埋人地嗰份嚟痛。有時痛苦令人悔改，但嗰個人受苦之前，一定已經想改，如果唔係，再受苦的人，都可以只係埋怨、憎恨，而唔去反思。受777災害的人就算覺得是天譴，也只會咒罵上天，跟兩個傳道人、地上的敬拜群體所受的苦，不是同一層次。

▍   真假上帝

七碗之後，出現咗三個人物：海獸、龍、地獸。海獸有個頭好似受咗致命傷，但又醫好咗，好似耶穌從死𥚃復活咁。地獸講嘢好似龍，識得降天火，叫啲人幫海獸造像崇拜祂。呢隻嘢同龍，關係就似聖靈同上帝，一個講嘢、一個沉默。《啟示錄》話呢三隻嘢加埋係666，有學者話同777只係纖毫之差，卻是天淵之別，係魔鬼假扮上帝三位一體。

呢個講法出自吳慧儀的《談情說理話新約》，當時印象深刻，原來《啟示錄》可以讀出神學，而不是世界末日電影預告。用呢個解讀理解「屬靈爭戰」，就唔係趕鬼驅魔呢啲神怪嘢，而係著重分辨，人心中魔鬼同上帝的聲音。係難，但慢慢就明，要你無咗自己，去佔有人地，係魔鬼，墮向火湖；要你建立自信，自由去愛，就係上帝，通向天堂。

但「龍」畢竟只是象徵，代表邪惡只在某個文化符號系統適用。就似「深海」同「眾山」，喺《啟示錄》或者《詩篇》都可以解邪惡，但山海豈不也是上帝創造。如果你覺得「龍」係邪惡禁忌，一見龍就要滅，咁姓龍啲人是咪要改姓？龍珠、龍貓、李小龍點算？唔使扒龍舟，唔使舞龍？與其糾結無窮無盡無謂的禁忌，不如認真睇吓聖經啦。

P.S. 送幅「九龍」圖畀大家賀年～

文：JC