網上ASMR基督教會崇拜 聲優讀經

用口語讀經，可以去到幾盡？小編最近發現有個日本的Youtube頻道，自稱「ASMRキリスト教会」，中文譯出嚟即係ASMR的基督教會。

ASMR流行咗一排，係英文縮寫嚟，autonomous sensory meridian response，自發性知覺經絡反應，有人直接叫做「臚內高潮」。唔一定係音樂，就算係重複的聲音，類似white noise或者pink noise，如果令你耳根舒服，好似按摩咁，有份麻痺感覺由脊柱一直向下流，就係ASMR喇。

咁呢個「網上基督教會」又點用ASMR呢？佢地揾咗一班聲優，微聲細語咁誦讀日文版《聖經》，仲有主禱文、使徒信經等。例如《啟示錄》選段揾把男聲讀，《詩篇》選篇就係女仔讀。自2022年開台以來，總瀏覽次數已逾10萬。佢地甚至舉辦數場主日禮拜，有讀經、告解、祈禱的時段。

頻道的介紹說，這是間「通過ASMR傳播基督教的網絡教堂」，睡眠、散步時都可以聽聲優的耳語或朗讀，治癒心靈。佢地宣稱係福音派，而且係加爾文改革宗，在短片中使用1954-55年出版的口語聖經。佢地又寄語大家，當困難來臨時，要「記住聖經」。

可能我地覺得聽聲優讀經好正、好療癒，又或者我地擔心影片的圖像令人有性聯想，但選擇立場，或許沒有思考的過程來得重要。點解呢間網上教會選擇用聲優傳福音？基督徒聽聖靈歎息時，係咪應該剩係得愉悅同享受？翻譯聖經用其他語言，或者口語，其實都係想用人話將上帝的話語講入人心，咁用流行文化的符號，例如用動漫與戲劇改編聖經故事，算唔算係傳道？呢啲問題只係開端，望讀者舉一反三。

文：JC