【輾轉顛撲蛹終破：專訪呂宇俊傳道（二）】

見工畀人問你「憑咩」，會有咩情緒反應？今日香港就算大學畢業，揾份工都唔係易，但畀你揾到長工，「係咪想成世都係咁？」嘅掙扎，幾十年前有，今日一樣都有。

呂宇俊傳道住加拿大温哥華，興趣廣泛，做開戲劇，又學過殯葬禮儀、遺體防腐。可是，開出自己條路前，佢退過學、轉過好幾次學，撈過幾份工，會考零分，見工想做辦公室助理，卻畀人劈頭問，「你憑咩？」

▍    連斟茶遞水都畀人話冇資格做

馬路車影掠過，行人步速同樣飛快，呂宇俊見完工呆站灣仔街頭，形容當時好似周星馳啲戲，一條友攞住張會考零分嘅cert，戇居居企咗喺路邊。

佢諗，辦公室助理其實都只係斟茶遞水，用吓影印機，但自己連英文地址都唔識寫，又真係連呢份咁簡單嘅工都做唔嚟。如果係咁，仲可以做啲咩？

▍    係咪想成世都係咁？

呂宇俊諗返轉頭，自細就習慣自把自為，小六就因為唔想讀男校，唔跟大隊原校升讀，揀咗間職業先修學校。中一過得不錯，卻因為一次在地鐵站動手打人，給老師逮住，本來只是記過，卻因為唔忿氣而自己退學，入了間更差的私校。中三淘汰試考得差，中四就輟學。

在彩虹邨住呂宇俊對面的一家四兄弟，一直關照這個細佬。大哥介紹了呂宇俊做第一份工，在觀塘做印刷廠學徒。當時印刷需要轉紙，而呂宇俊的工作，就是將架裝紙的織車推來推去。

這份工放傍晚六點，成班𡃁仔放工，但工頭仲坐喺度，呂宇俊當時過去問身穿爛背心的工頭點解仲留低。原來六點至九點，就算齋坐都可以收額外人工，萬一第時要開夜，工人先會有動力。但十幾歲嘅呂宇俊，唔覺齋坐都有錢收好著數，而係心諗，如果自己第時升職，要九點先放工，咪連識女仔嘅時間都冇？「自己係咪想成世都係咁？」

當時人好鍾意講「不如畀個經理你做？」呂宇俊指，讀唔到書出嚟做嘢，通常一係等升職，一係就做紥鐵、搭棚。但朋友笑他「咁虛弱，做一日病三日啦」，地盤工做唔嚟，又唔識英文，升職都難，何況做經理。於是就在太子附近讀夜校，讀不來就轉間交學費就報到會考的學校，結果就考咗個零分返嚟，然後去見工，就畀人問：「憑咩我要請你？」

▍    教會啲人應該唔會問我「憑咩？」

呂宇俊指，許多年自己做決定，原來可以愈揀愈差。但他感激這個問他「憑咩」的人，刺激他下了個對的決定，及後發奮圖強。當時他想起，隔壁的斌哥哥帶過他返教會，入面啲人幾好，應該唔會問自己「憑咩」。於是他就回到深水埗，找傳道人傾偈。

傳道人問他，咁你想做咩？當時呂宇俊答，想做社工、教師、牧師，因為這三類人都幫過他。傳道人果然冇問佢「憑咩」，而是說，咁你要讀多啲書喇喎，甚至揾啲義工幫佢補習。於是，呂宇俊一邊補底，一邊在教會做幹事，痴郵票，學用中文打字。他笑說，在教會學識速成，有助他日後去植字公司打工，將重刷的倪匡《四條金龍》文稿重新打一次出嚟。

考入浸大宗教及哲學系，一級榮譽畢業，再到中大崇基讀神學，就是後來的事。呂宇俊回想，如果不是屋企彩虹邨對面那家人，佢就唔會返教會，世界可能就困喺彩虹一帶，突破唔到。

文：Jon