聖誕節是挪用了異教節日？
聖誕係基督徒紀念耶穌來到人間的重要日子，亦係好多人同愛人、親人團聚嘅日子。但有冇諗過，點解係12月25號呢？近年流行一個講法，話12月25日其實本來係羅馬人敬拜太陽神嘅節日，後來畀基督教挪用咗。咁究竟可以點理解成件事？
身在德國的浸信會宣教士蔡錦圖博士早前撰文〈關於耶穌誕生日子的迷思〉，就引述歷史研究，質疑呢種講法。蔡錦圖認為，基督徒仍被羅馬政權逼害時，刻意同對家保持距離，唔可能用「無敵太陽」的慶典做聖誕日，而且將12月25號定為聖誕，其實早過羅馬大帝君士坦丁歸信基督教，所以聖誕日借用異教節日的講法唔太穩陣。
蔡錦圖引述專門研究早期基督教歷史的耶魯大學神學院教授 Alexander McGowan，他的文章〈How December 25 Became Christmas〉提到，早期基督徒的敬拜儀式，例如聖餐、紀念殉道士的聚餐、喪葬禮等，都含有別人容易明白的「異教」元素，卻刻意跟大型的羅馬節慶保持距離，例如祭祀、聖日（holi-day），以示分庭抗禮。
McGowan推斷，早期教會將12月25號定為聖誕，可能因為他們相信，耶穌母親馬利亞受孕的日子同耶穌受難日係同一日，而加返懷胎的時日，就推斷出佢邊日出世。McGowan引用教父奧古斯丁說，無人如耶穌那樣，在童貞女的子宮成形，正如無人曾在十架死去，卧在陰墳，而聖母的子宮對應陰間的墳場，正如聖誕對應復活。
蔡錦圖說，雖然福音書、使徒行傳，甚至第一、二世紀的文獻，都較關注耶穌的生平，尤其著重復活節，而沒有提及耶穌誕辰，但到了四世紀中葉的年曆，已經有明確的聖誕日子。而奧古斯丁就是生活在這個年間的重要神學家。
兩千幾年前出生，行走中東荒地，被羅馬政府處死的一個人，多個世紀以來持續影響著全世界。他跟今日活在香港的你我，又有甚麼關係？趁著今日聖誕節，不妨思考一下這問題。
文：Jon