國際擁抱日：鼓勵擁抱家人與朋友

今日除咗跑渣馬，亦係國際擁抱日！

呢個日子由牧師Kevin Zaborney喺1986年喺美國密歇根州發起，已經有38年歷史。顧名思義，國際擁抱日就係鼓勵大家更多擁抱家人同朋友，為到有著彼此而感恩。

Kevin牧師創辦擁抱日嘅時候，其實只係一個讀緊心理學嘅大學生。佢發現，擁抱呢個咁重要而正面嘅行為，竟然無一個日子去紀念，所以就提出呢個建議，叫人一齊慶祝。點解揀1月21號？因為呢一日喺聖誕節同情人節中間，佢又覺得，通常大家喺全年呢個時候心情都嘛嘛地。

本身從來無預計過會變成國際知名日子，點知Kevin牧師朋友嘅爺爺竟然將呢個日子收錄咗係佢經營出版嘅Chase's Calendar of Events度！無幾耐，世界唔同國家都有人慶祝呢個日子。

Kevin牧師話，聖經馬可福音10章13-16節，都有記載耶穌都有擁抱小朋友㗎。而佢地教會嘅弟兄姊妹更加早已習慣成為擁抱別人的人。

國際擁抱日官方網站羅列咗一系列擁抱嘅好處，例如可以令人紓緩壓力、提升社交能力等等，總括而言就係人都健康d咁話啦~

趁住今日星期日多D時間同朋友家人見面，大家記得hug下佢地喇~ 不過，Kevin牧師亦都提醒，擁抱別人之前，記住要先問問對方意願啊。

文：IC