「完善地區治理」後嘅區議會，究竟諗出咩辦法「提振地區經濟」？深水埗民政處噚日就喺區議會嘅工作小組present，諗出喺福華街同電腦商場一帶，舉辦新興運動「激光劍」嘅體驗日，希望可以吸引到青年人到訪深水埗，振興深水埗經濟。

深水埗區議會提振地區經濟專責工作小組成員何坤洲今日喺港台節目話，過往大家對於深水埗嘅印象，都離不開黃金商場、買賣電子產品，所以區議會希望喺福華街一帶，舉辦激光劍活動，希望透過呢項新興運動，配合比較新嘅嘢，包括電子產品、Cosplay等等，吸引市民同遊客嚟深水埗，帶旺人流振興經濟。

何坤洲仲話，活動初步構思喺室外地方舉行，希望有比較大嘅場地，並且擺啲攤位，包括Cosplay、動漫等主題。主持就忍唔住問，激光劍喺戶外地方，光燦燦咁都睇得清？何坤洲無正面回應，只係重複話：戶外，係戶外地方！

深水埗民政處畀區議會嘅文件就話，福華街同鴨寮街一帶嘅數碼產品區，係深水埗認知度最高嘅分區，對外區訪客同遊客已有一定吸引力。建議2月舉辦暫名為「激光攻殼@深水埗」嘅活動，就係為咗切合深水埗作為數碼產品區嘅特色，以吸引青年人、動漫愛好者、數碼產品用家到訪。

佢哋計劃活動期間，喺區內電腦場配合舉辦活動，商店同餐廳都可以推出吸引消費者的方案，好似參加活動可以獲得折扣優惠之類，吸引市民喺指定零售店和餐廳消費。佢哋認為數碼產品同動漫主題互補性強，可以提升數碼產品區嘅氛圍咁話喎。

文：LH