上星期我哋整嘅「2023基督徒（非打卡）清單」，都見到唔少人有填，其中就包括Youtuber Gordon Lau有份新開講信仰嘅IG「窄路燈」 @walkwithfaith___ 。

Gordon同小編講，填完之後覺得，原來自己仲有好多嘢可以做，或者係一直以嚟，自己都只係做緊「信仰舒適圈」內嘅嘢。新一年，希望可以再做多啲。

之後「窄路燈」都整咗個「非典型基督徒2023打卡清單」，項目包括「訓過龍無翻崇拜」、「掛住玩唔返團契」、「怕尷尬，唔敢謝飯祈禱」、「唔捨得同無奉獻」、「睇弟兄姊妹唔順眼」、「無改善不良行為」等，最後一格係「承諾2024年改善以上行為」。

點解個清單叫「非典型基督徒」呢？Gordon就話，因為普遍人心目中「典型」基督徒，就應該同上述嘅問題無關，唔會做啲「唔好」嘅事，但其實每個基督徒都會經歷掙扎同犯錯，用「非典型基督徒」呢個名，係想做一個反諷。

至於整呢個清單嘅原因，Gordon話因為當中嘅項目，都係基督徒比較常見會「做唔好」嘅事，希望透過公開承認自己做得唔好嘅地方，新一年會改善呢啲問題。

文：LH