太子站講緊邊個太子？

成日見太子站叫Prince Edward，其實呢個愛德華王子係乜水？而家大家最熟悉嘅，大概係英王查理斯三世個細佬、舊年封為愛丁堡公爵嘅愛德華王子，不過一來佢一直無做過王儲，二來有太子呢個名時佢都未出世。查實「太子」真身係愛德華王子嘅外伯公──做過英王唔夠一年，退位後得到溫莎公爵名銜嘅愛德華八世。

話說當年仲係英國王儲嘅愛德華王子1922年到訪香港，參觀一條連接旺角同九龍城一帶道路嘅興建工程，之後港英政府就將原名「宜華徑」改做「愛德華王子道」紀念佢嚟過參觀，後來又改名「英皇子道」。不過，1935年港島嘅「英皇道」通車，為免混淆，「英皇子道」就變咗「太子道」喇，不過英文名就一直都係Prince Edward Road。至於1982年先至啟用嘅太子站，起名就係因為選址喺太子道附近。

講到愛德華王子，其實佢一生都好傳奇，作為「太子」嘅佢1936年1月繼承王位，成為愛德華八世。不過，佢只係做咗英王326日，就為咗同美國名流辛普森夫人結婚，最後決定退位。點解國王想結婚會搞到要退位呢？事關辛普森夫人曾經兩度離過婚，而英國國王身兼英格蘭國教聖公會嘅領袖，當時首相同教會領袖都認為，娶一個前夫仍在世嘅離婚女子係違反教義，如果咁做就唔能夠繼續做國王，將會釀成憲政危機。

最後，愛德華八世「不愛江山愛美人」，1936年12月宣佈退位，由細佬繼承王位，是為喬治六世，亦即係英女王伊莉莎白二世嘅爸爸。喬治六世以英國王室嘅姓氏安咗個「溫莎公爵」嘅新頭銜畀退位嘅哥哥，而辛普森夫人隨後都成為溫莎公爵夫人。

由於佢哋無仔女，爵位無人繼承而中斷，愛德華就成為史上唯一嘅溫莎公爵。所以位於灣仔嘅溫莎公爵社會服務大廈，同位於九龍嘅「太子」其實都係講緊同一個人。

文：LikHang