今日（9月22日）係世界無車日（World Car Free Day）。呢日鼓勵啲人唔用私家車，紓緩氣候變化。為咗響應無車日，《低聲道》幾個小編決定今日由旺角舊office行去荔枝角新office返工，喺酷熱天氣警告之下，最後行咗差唔多兩個鐘~

▍世界無車日關注空氣污染

世界無車日係點嚟嘅呢？原來喺1998年9月22日嘅法國，有居民發起拒絕使用汽車，之後「無車日」就慢慢席捲整個歐洲。在2000年，歐盟正式將無車日列為環保政策，喚起大眾關注汽車污染、環境保護議題。去到今日，已經有好多城市加入。2009年，香港時任行政長官曾蔭權響應香港第一個無車日，都試過由禮賓府行去特首辦返工。

▍深水埗遇見跑開步嘅 Nelson 牧師

我地喺旺角office舊址出發前，先同樓下嘅保安叔叔吹咗幾句水，原來佢話平時見住我地成班人出出入入，而家唔見咗，係差咁啲，「唔識點講」。雖然小編加入無耐，但都想像到十年光陰的日常相處，都可以有清淡但深刻嘅感情。上到舊址門口，見到入面空蕩蕩，反而有種豁然開朗嘅感覺。無咗啲間隔，原來真係幾大。

1045，我地喺旺角一路行去深水埗，1115左右上咗香港基督徒學生福音團契 (FES) 地頭，入去歎吓冷氣，又同 FES 同工 Ben 吹咗幾句水。之後我地搵咗喺同一棟大廈返工的 Nelson 牧師傾幾句偈，原來佢一直睇緊我地直播！

我地早前訪問過「喜歡跑步跟神傾偈」嘅Nelson牧師，佢今日講到自己從馬鞍山跑到教會已經有三四次，沿住大圍跑到大埔公路，返到教會，都需要一個幾鐘，試咗幾次都覺得幾好，所以可以堅持。

▍風雨不改的行返工達人雷競業牧師

1150，我地去到學基浸信會附近，撞到香港教會更新運動的梁國全傳道，佢邀請我地上去佢office坐吓，就唔客氣啦。入到梁傳道間房，原來佢啱啱同中國神學研究院雷競業牧師開完會過嚟，一於就打畀鍾意行山嘅雷牧師，問吓行開鵝肚棧道嘅佢，點睇「世界無車日」。

雷牧話行山係對自己嘅挑戰，好需要discipline，「太易唔好玩，太難會跌死」，行行吓可以知道自己喺咩階段、能力去到邊，係一個「學習自己、接受自己的exercise」。佢曾經行過最長嘅路係屯門嘅杯靈雙渡，行咗5個鐘。除咗行山，雷牧師平時都鍾意行市區，如果星期日去一間冇去過嘅教堂，就會一早去到附近食早餐，探索社區。雷牧師又話後悔中學嗰時掛住睇武俠小說、愛情小說，無乜點去多地方，對於70年代香港個樣記憶不深，希望依家可以補返，多啲認識香港這個城市，甚至每日用半粒鐘堅持步行返工，風雨不改。

▍1230終於返到荔枝角新址

同雷牧師傾完偈，落返曬到三十度嘅青山道，行多幾個街口，1230終於返到嚟低聲道喺荔枝角嘅新址喇。我地機構時代論壇為咗開源節流，由旺角搬到嚟荔枝角，但搬遷本身都用咗一筆錢，如果大家認同論壇／低聲道做緊嘅嘢（又祈過禱覺得我地尚算為緊上帝做嘢），都可以考慮課金支持我地呀～

廣告時間完畢，最後總結，行多啲路身體好，見多啲人樣、識多啲街名。如果覺得行車路太多廢氣，咁去行山啦（利申：小編好想同雷牧一齊挑戰好玩嘅山路～）。臨返到公司，另一位小編 LH 提到，可以選擇行路其實是奢侈，好多貧困地方連返學、返教會都要侷住行幾個鐘山路。不過，既然有得揀，就更加唔好徙喇。

完～

文：JC、SY