【聖經熱知識】

咁多位讀者，有無收過風，聖經記載人類歷史上第一宗「打死人」事件，邊個係犯人、邊個受害？答案就係創世紀第四章，阿哥該隱同細佬亞伯。

亞當同太太夏娃交歡，夏娃就有咗身孕，生咗該隱，就話：「耶和華畀咗一個男人我。」又生咗該隱細佬亞伯。亞伯係牧羊嘅，該隱就係耕田佬。有一日，該隱攞啲穀種獻畀耶和華做祭物，亞伯又攞最早出世啲羊仔、擠啲羊膏獻畀耶和華。耶和華睇中亞伯同佢啲供物，就係睇唔中該隱同佢獻嗰份。該隱就發爛渣，臉都黑埋。耶和華問佢：「你做乜咁嬲？塊臉做乜黑晒？你做得啱嘅話，我點會唔中意？你做得唔啱，罪就伏喺隔離。它想痴實你，你要撇甩佢。」

該隱搵細佬吹水，兩兄弟並肩喺田間行走。估唔到該隱突然喪毆亞伯，打出人命。殺完人，耶和華就問阿哥：「你細佬亞伯，去咗邊？」佢發晦氣：「我點x知！家陣我係佢保姆啊？」耶和華話：「你知唔知你做咗啲乜？你細佬泉下同我訴冤！地開口接過你細佬啲血，依家你就畀同一塊地咒詛。你種親地，塊地都放圮。你去邊度，都無埞好住。」該隱講價：「你罰得我咁甘，我邊頂得順啊。你趕我離開呢度，見唔到你。我出去躝街，撞親乜水都實想殺我啦。」耶和華就話：「邊個殺該隱，七倍奉還，得未？」祂畀該隱一個記號，費事啲人見佢一面就想捅佢一刀。跟住該隱就轉身背離耶和華塊面，遷去伊甸園東邊一笪叫做「挪得」嘅地住。

譯／文：JC