近年花唔少時間讀聖經嘅演員黃秋生，噚日喺FB寫咗「一小段根據解經書嘅聖經解讀」，提及創世記講神創造天地嘅「神」字嘅原文elohim係眾數，「所以係眾神，唔係一個神」，引來聖經學者高銘謙博士留言回應，話elohim並唔係解作「眾神」，而係指「一位尊稱的神」。

黃秋生話起初創這萬物嘅「神」字，原文elohim係眾數，「所以係眾神，唔係一個神」，係一班神由一個眾神之神帶領之下創造萬物。佢仲話，創造並非由虛無開始，因為「創造」的原文bara呢個字係翻新、更新、改造嘅意思，「所以，眾神係改造既有嘅物質，重新創造萬物。」

至於上述講法嘅來源，黃秋生話係根據「解經書」，但就無講明係邊本書。佢最後亦都戴返個頭盔：「係咪好顛覆？玩下咋，可能我理解錯咗。」

建道神學院聖經研究部主任高銘謙博士就喺黃秋生個post度留言，解釋elohim作為眾數，通常理解為「a plural of majesty」，並不是解作「眾神」，而係指「一位尊稱的神」。高銘謙又提醒，要特別留意「創造」（bara）呢個字，在原文看來係第三身單數，而唔係眾數作subject。

講開聖經詮釋嘅專頁「Fox的安心詮釋」亦都加把口，問咗兩個幾有意思嘅問題：「咁多字可以指涉上帝點解要揀語意含糊的elohim？希伯來文動詞名詞單數眾數係咪一定夾？」佢仲話，學咗聖經原文未必有所謂答案，事實係問題仲多，期待佢哋繼續對話，以展現問題嘅深度同闊度咁話喎。

文：LH