ai尹光再唱《俏耶君》 詩歌網站收錄《一人查經》

早前發佈《一人查經》嘅Youtube頻道VirtualTours再有新作！今次嘅「詩歌」再次由AI尹光演繹，唱出由張敬軒《俏郎君》改詞而成嘅《俏耶君》，一入副歌，真係睇字都覺得有聲：「嗱唔讀聖經太荒謬，你我牽牽手一再合唱主能夠，信主能夠。齊齊高歌敬拜不需怕羞，佢大愛冇失手唔怕落後。」

今次改詞作品係網民JC投稿，比起該頻道上一首「詩歌」《一人查經》，多咗網民覺得有陣宣教味：「光b宣教令我感受到神就喺我附近」、「正， 感覺同《一人查經》可以連成故仔。唱完呢首傳教之後，教人一個人原來都可以查經。」唔知大家聽完兩首歌之後，又會唔會更加想讀聖經、唱聖詩同埋查經呢？

Google一下《一人查經》，發現首歌已經登上咗號稱全球最大粵語詩歌歌詞庫嘅CantonHymn，網站創辦人之一Anthony就話，佢哋係維基式系統，都係網民擺上去，佢自己就覺得擺呢首歌無問題，就算係AI尹光唱，改詞嘅都係真人，其實性質同流行曲改詞詩歌差不多，未計福音粵曲，CantonHymn都收集到600幾首流行曲改詞詩歌，只不過呢首詞相對比較玩味少少。

據Anthony對AI cover嘅認識，佢相信而家嘅AI尹光唱《一人查經》、《俏耶君》等等，背後其實都有個人唱，只係用AI將尹光嘅聲線換入去。佢覺得AI cover其實相當值得研究，而家好多外國詩歌有人譯咗粵語版，都未必有適合嘅人同團隊演繹同製作出來，如果將來真係可以有歌譜同詞，AI就識得整個cover出嚟，其實都幾幫到中譯詩歌嘅傳播。

好多人話AI創作無靈魂，Anthony指AI創作出嚟嘅作品，最後都係由有靈魂嘅人去把關，就好似字典都係無靈魂嘅死物，但翻譯嘅人總會用到字典。佢認為字典同AI兩者同樣係中性嘅工具，唔需要一刀切去判斷佢嘅價值，而係應該視乎佢喺創作過程中幫到幾多。

文：LH