噚晚十一點，你有無參加Halloween Party？

當「基督徒應否參與萬聖節活動」已變成猶如「中學生應否談戀愛」嘅話題，倒不如忘記過去（即係噚晚），趁今日「諸聖節」記念下一班先聖，順便開支威士忌，先飲為敬。基督徒不可醉酒嘛，知喇知喇……但原來，基督信仰同酒文化有莫大淵源。就講講威士忌！

▍ 修士釀造「生命之水」

威士忌係蒸餾而成嘅烈酒，呢種蒸餾技術邊度嚟？話說，當年十字軍東征，佢哋喺阿拉伯嘅「戰利品」之一，就係阿拉伯人用來萃取香料製造香水嘅「蒸餾器」！跟住有人忽發奇想，可摸耳將呢種蒸餾技術用嚟釀酒？到咗今時今日，唔使問，當然得啦。有網上資料話，正正因為蒸餾出嚟嘅酒，酒精濃度更高、令人更high，恍如將酒嘅精華同靈魂都提煉出來，所以烈酒又稱為spirit。

話說回來，威士忌嘅發源地，究竟係蘇格蘭定愛爾蘭？一本名為《克朗馬克諾斯年鑑史》嘅愛爾蘭文獻，據估計由一班愛爾蘭傳教士所編寫，當中一段關於1405年嘅紀錄是咁的：「一位部落的酋長因為喝下過量的『生命之水』（Aqua Vitae）去世」。蒸餾酒嘅拉丁文就係 ”Aqua Vitae”，亦疑似係威士忌嘅起源。

▍ 修道院名字 = 皇帝御用威士忌品牌

文獻嘅嘢，愛爾蘭有，蘇格蘭都有。一份關於1494年6月1日嘅財稅卷宗（Exchequer Rolls）文獻，上面有句拉丁文（又係拉丁文），中文意思大致係咁：「給約翰．柯爾兄弟，奉國王之命，用八Bolls的麥芽製造生命之水。」據講，呢份係世界上第一份有關威士忌生產嘅文獻。而呢位約翰又係邊個？佢「原名」John Cor，係林多修道院（Lindores Abbey）嘅修士。當時佢用咗八綁（即大約500公斤）大麥，為當時嘅蘇格蘭國王詹姆士四世，釀咗400樽威士忌。所以，今時今日好多人話呢度先係威士忌發源地。至於呢個修道院，相信後世人唔會聯想到信仰，只會知佢係一個威士忌品牌，too bad…

講開牌子，仲有另一個威士忌品牌同牧師都有啲關係。名就唔開，不過相信好多人會估到，就係JxxK Dxxxxl。同品牌同名個位創辦人，即係傑克呢，本來係個孤兒，好彩得一位叫Dan Call嘅牧師收養咗。當時十九世紀，美國好多南方傳教士都會用玉米釀威士忌，Dan牧都唔例外，聽講仲係表表者。後來Dan牧退休想賣咗酒廠安享晚年，唔知係咪知恩圖報，傑克仔決定買咗個廠，釀酒技術更青出於藍，於是呢支老蘭酒吧無一不存嘅威士忌，就誕生咗。

以後大家飲酒之前，不妨留意吓每款酒嘅歷史，即使啤酒、香檳，原來好多都同修道院有關。但當然，記得夠18歲先飲啊~

文：Sh