前日本台報道早前有個「#目標驅動新人王 Life Game 2023」（以下簡稱「Life Game」）嘅模擬人生Camp，有參加者講返佢哋喺Camp入面嘅特別經歷，引起唔少討論同迴響，而KFC嘅意思更加係佢哋冇預計過會有咁大反應（想知請睇返上一篇）。我哋今日訪問咗Life Camp嘅原創人John Kwan牧師，同埋有份將呢個意念引入香港嘅鍾樹森牧師，了解吓佢地嘅諗法。Life Game其實已經有近40年歷史，主要想帶出嘅信息係人可以自由選擇人生，包括你可以做你想做嘅職業、用你想用嘅方法賺錢同學歷，多年嚟為好多人帶嚟生命嘅改變。

▍　重新選擇想要的人生 從遊戲結局中反思生命

Life Game創辦人係來自馬來西亞嘅John Kwan牧師，當時因為發現年青人同父母好難明白對方，於是諗住設計個遊戲，比啲年青人去體驗一下對方嘅角色，明白對方嘅難處。John牧分享，有個媽媽因為見到個仔出camp後嘅性格同態度有所改變而感動，呢類正面嘅回應令佢想繼續做落去。

遊戲最初係John牧為佢所服侍嘅青年人而設，而家已經推廣到世界各地，有唔同宗派嘅教會、機構同神學院成為伙伴，影響過數以萬計人嘅生命。John牧話，遊戲嘅目的係畀個機會參加者為自己人生做決定，但唔係教佢哋應該點做，而係透過呢個「Simulation City」式嘅平台，讓玩家自行決定佢哋想要嘅人生。由於可以喺遊戲裡面重新選擇自己嘅人生，結局當然可以有好有壞，但係佢哋可以透過選擇後嘅結局，再反思自己嘅真實人生，從錯誤中學習。

▍　遊戲強調自主及按地區本色化

Life Game被引入香港已有十幾年歷史，參與營會服侍多年嘅義務統籌鍾樹森牧師表示，香港版本有90%以上係跟返馬來西亞嘅玩法，只係微調咗需要本色化嘅地方，例如馬來西亞同澳門都有賭場，但喺香港嘅設定就唔會有；而香港區Life Game相對其他地區，股票市場就「長期都好旺」。John牧補充，參加者可以自由選擇傾向神、自己或罪惡，亦可以選擇學歷有幾高、做咩工、結唔結婚、追求較高社會地位或者做平民，唔係個個選擇都係啱，但從中可以睇到做決定嘅原則同價值觀係點。

現今的Life Game已加入了屬靈元素，例如背經文考試去換取學歷。對於有人回應被迫背聖經，John牧就話平時考試其實都係要背嘢，「你唔去背聖經，我咪畀另一篇嘢你背，都係冇分別，但背到嗰篇嘢對你一生冇益，不如背一啲嘢係對你一生會有用、有幫助。」鍾牧師補充，如果參加者選擇嘅職業冇學歷限制，例如做生意、炒股賺大錢等，係有權選擇唔去背聖經。

至於Life Game係咪唔太適合未信者，John牧就話有講清楚係教會主辦嘅活動，參加者應該都知道；雖然有非信徒參與，但都會有環節講解信仰，不過最後信唔信都係自己決定，唔會迫佢哋。

文：MM7

（圖片由受訪者提供）