暑假除咗去旅行，仲係去camp旺季。教會每年搞camp似乎係例牌活動，唔知你最enjoy嘅camp moment又係啲乜嘢呢？講到去camp，又點少得玩吓遊戲破吓冰，仲可以一睹大家嘅真實嘅一面！小編們精選咗幾個經典嘅教會camp遊戲，唔知你哋去camp嗰陣玩過幾多個呢？

我哋一齊盤點吓有咩經典game啦～～（排名不分先後）

#大電視：透過語言或肢體動作去比隊友估吓個題目咩，無論上至天文下至地理，抑或聖經人物同屬靈詞語，過程中總會發現到對方究竟係神隊友定係豬隊友，可以爆笑得嚟又可以增進吓感情，小編估計呢個永恆遊戲應該係最受歡迎嘅game之一。

#TrustFall：呢個簡直係友情同信心嘅大考驗，完美測試到你對隊友們嘅信任！講真，就算信隊友，瞓落去嗰吓點都會驚嘅。就正如我哋成日話要信靠神，但當每次要踏上信心之旅時，咪一樣會驚。

#解手結：如果人數夠多，絕對係一個考驗團隊精神嘅遊戲，考吓大家嘅技巧同默契。大人細路都啱玩，又唔洗用其他道具，但就要小心啲唔好整親人哋同自己隻手。

#報紙起塔：呢個策略遊戲可以考吓大家智慧、發揮創意，點樣喺擅長嘅崗位做返應該要做嘅嘢。不過，要喺有限時間一齊商量做好一件事，真係少啲默契都唔得。

#大風吹：呢個遊戲相對要用多啲體力，仲係一個良心嘅考驗。跑嚟跑去再加上好多把尖叫聲，場面的確好興奮，亦可透過啲問題更加了解身邊嘅弟兄姊妹；但同時，亦會有人因為怕輸而齋坐唔敢起身。

#估歌仔：雖然喺教會入面成日都要唱詩歌，但唔會個個都識唱歌。遊戲出現嘅或者係一首耳熟能詳嘅歌，而你可能會重新認識一首詩歌。不過，要記住，無論你唱成點，神都會悅納嘅。

#Checkpoint：絕對係考驗你智慧同觀察力嘅遊戲！大家一齊分工合作，各施其職，睇住啲線索再搵到要去嘅地方，呢個過程其實都幾有滿足感。

唔知大家最印象深刻、最鍾意玩嘅又係咩game呢？歡迎留言話比我哋知！

文：MM7