因為疫情而停課/上網課，相信會係呢代學生嘅集體回憶。雖然小編早已唔再係學生，但隱約記得，當年都曾經因為疫情，停課一段唔短嘅日子。Google一下發現，2003年3月29日，即係20年前嘅今日，全港學校因為SARS疫情開始停課，到4月22日起陸續復課，到5月19日始全港復課，歷時51日。

雖然停課期無今次疫情咁長，但係20年前科技同今日仲係爭好遠，大家唔會人手一部智能電話，電腦都未必個個屋企有，Zoom、Google Meet都未出現，一般學校根本無能力自己做實時網課。不過，當年教統局（年代久遠，名都改埋）都提出所謂「停課不停學」，叫學校可以透過電郵、學校網頁或其他方法，向學生提供學習材料、幫助學生解決學習問題。

睇返資料，原來當年都有人推網上教學。香港教育城當時就推出過「視像互動課室」，用嘅係一間美國公司送出、叫做「click-to-meet」嘅軟件，邀請老師講課，畀學生網上自學。香港電台都製作咗多項特備教育節目，並透過網站提供「上網問功課」服務。

不過，幾位當年都讀緊書嘅小編，對於所謂「停課期間的網上學習」都無乜印象，印象中都係睇電視、打機之類。睇嚟當年網課嘅普及程度，應該同呢幾年大家嘅經歷，相差好遠喇。

2003年爆發嘅SARS，世衛命名「嚴重急性呼吸系統綜合症」（Severe Acute Respiratory Syndrome），之前一般稱「非典型肺炎」，好多香港人音譯叫「沙士」，2003年3月爆發，到同年6月23日世衛將香港從疫區名單剔除。

根據香港衛生署資料，SARS累積個案共1755宗，當中299人死於SARS，5人死於其他原因。感染SARS個案中有386人係醫護人員或者醫科學生，當中有8位不幸殉職，包括屯門醫院胸肺科謝婉雯醫生，被稱為「香港女兒」，事跡亦被改編為福音電影《天作之盒》。

文：LH

（圖：亞視2003年大事回顧節目截圖）