一人一個細個返教會誤會咗意思嘅詞語

早兩日我哋喺IG收集咗大家「一人一個細個返教會誤會咗意思嘅詞語」，今日小編揀咗五句精選出嚟。唔知大家聽到呢啲句子時，又有無咁樣誤會過呢？

1. 諗咗好耐點解「鵝是豬的羊」，唔明三種動物有咩關係
2. 「主XX~主XX~我知祂XX~」，以為教會唱粗口歌
3. 班人講到好尊敬上帝咁，但又會大大聲唱「我煮我上帝」
4. 馬利亞明明係耶穌阿媽，點解殺馬利亞的都係好人？
5. 團契成日話要「交通」，仲以為要搭車去邊度

小編邀請咗研究粵語嘅歐陽偉豪博士（Ben sir）@ben_sir_dr_ben 分析，頭兩個誤會，部份都係旋律同歌詞嘅高低音唔配合所致。好似「我是主的羊」變「鵝是豬的羊」咁，旋律中「主」屬較高嘅音，而「主」字喺廣東話裏面調值比較低，所以用個高音唱出嚟就變成一隻豬嘅「豬」，「既然有羊有豬咁高興，不如前面將個我想像成鵝，咁就湊夠三隻動物。」

最多人話誤會過、教內外著名嘅「主能夠」，Ben sir話「夠」嘅字調屬低音，但在旋律裏面屬高音，一唱出嚟就變成以g-做聲母嘅粗口字；所以歸根到底，旋律嘅高低音，要配合歌詞本身字調嘅高低音。至於「能」字嘅問題就關懶音事，Ben sir解釋：「『能』字韻母係-ang，以-g收尾，但我哋成日有懶音，冇讀埋個-g音出嚟，結果「能」字嘅韻母讀成-an，你估下邊個粗口字嘅韻母都係-an?」

除咗音調同懶音，Ben sir話同音字都係另一個造成誤會嘅原因。就好似「我主我上帝」變「我煮我上帝」係因為「主」、「煮」同音；而「殺馬利亞人」嘅出現，就因為音譯Samaritans做「撒瑪利亞人」之後，「撒」、「殺」同音啦。

至於聽到「交通」以為要搭車，有神學老師就話，從前的華人基督徒習慣用「交通」來表達信徒之間、信徒與神的交流。有一部份從前的慣用語，一直流傳。

唔知大家又有無喺教會誤會過咩詞語嘅意思呢？留言同我哋分享吓～

文：LH