精神科醫生 許龍杰 最近喺FB寫咗好多關於基督徒嘅post，引起幾多迴響。佢話自己幼稚園、小學、中學讀基督教學校、中學信主、大學洗禮，返過團契崇拜夏令會佈道會，做過司琴同團契職員，但而家連教會都唔返，卻依然堅信耶穌同埋《聖經》，至於做到幾多，就「做到幾多就幾多」，希望輕鬆一點面對這個荒謬的世界，所以選擇認真地是旦，呢個就叫「是旦主義」。

對於返教會呢回事，許龍杰形容係「由淺入深、由易到難、先甜後苦」的過程。初期首先感受到基督徒嘅愛同關心，比你好warm的親切感，而人總有愛的需要，香港大部份人一生中點都會踏入過教會門口一兩次，如果心情差或者同屋企人關係唔好，教會一家親的溫暖感好難唔令人融化，「融融下就融咗入去」。

然後好快你就會接受到好多基督教的道理，但許龍杰話當中更多係「教會中約定俗成的行為守則」，未必係一套成文法律，但就係人際關係的網絡之中，不停地影響你。在其中的人接收到的愛越多，所受到的影響就越大。許龍杰形容，呢個係一種peer pressure。

許龍杰舉例，好似拍拖咁平常嘅事，在教會裡面就成了天大的事：初初開始就以結果為目標、同未信者拍拖變屬靈爭戰等，當中的道德壓力有人會抗拒，但更多人會內化同接受，再將壓力不自覺地傳畀教會入面其他人，最後抖不過氣來，但又離不開個social support network。返返吓唔返的人初期會有罪疚感，但識返多啲出面的朋友，慢慢淡咗就無事。

佢強調「是旦」唔代表對信仰唔認真，亦唔代表降低上帝的道德標準，而係承認人是受造之物，都有人性的軟弱，「我們是人，不是神」，達不到完美的要求，就接受自己的軟弱和限制，盡量在能力範圍內做好自己，做不到的就放下jump over。

「諗返你當初信耶穌、返教會的初心。你係信耶穌，唔係信教會。」許龍杰覺得教會好多人以為自己好屬靈，內心充滿屬靈的優越感，對自己好harsh，對別人也非常嚴格，非常完美主義。

「他們喜歡口裡一大堆自謙之辭，講到自己幾咁不足幾咁軟弱，然後包裝說話當中一條教訓你的骨。」佢叫大家唔駛理佢哋，形容佢哋只係一班「宗教魔人」：「上帝如果咁mean，一早派洪水消滅你，唔會咁得閒落來釘十字架，更加唔會吸引你相信佢。」只要做好自己就夠：「你已經好吃力做人，做得好好，這些努力，上帝都看見的，只是那班宗教魔人看不見。」

一連5日出咗10個post，許龍杰今日就話對於「是旦信徒」的文章，佢很想再寫又很不想寫，因為教會問題根深柢固，盤根錯節，不想介入這淌渾水。「之所以寫這幾篇，只是因為一開始呻了一句『信耶穌很累』。再寫下去豈不更累。放過我吧。」

許龍杰後來係報道下留言要求刪post，話覺得報道令佢壓力更大、更累，其實佢只想安安靜靜信耶穌。佢話自己原意係覺得教會太多道德壓力，每一個信徒有每一個信徒的個人問題，家家有本難唸的經，應該多D包容，比多D空間人。

文：LH

（21/1 1pm補充末段內容）