之前關於「外判福音營」嘅文章都引起不少人關注，我哋就透過IG story問大家，接唔接受到各種教會外判，都有三百幾人回應，雖然唔係嚴謹嘅調查，不過相信都有一定參考價值。

其實《低聲道》讀者對教會外判都唔算太抗拒，五個項目全部都係揀「接受到」嘅多過「接受唔到」，不過不同項目接受程度嘅差異都幾大，接受外判嘅項目由高至低依次為講道（75%）、帶敬拜（70%）、輔導（67%）、主日學（64%）、福音營（52%）。

曾經喺兩間機構服侍過，做過「外判商」而家做堂會傳道的 Chapman Fu 就覺得，結果似乎反映堂會事奉專門化嘅趨勢。佢認為，我哋普遍會覺得主日學、輔導、敬拜、講道，以至好多時會搵外來講員嘅佈道會，係需要一啲有特別恩賜、技巧、訓練嘅人負責，教會亦就這些服侍有相關事奉崗位。相反，搞camp喺一般堂會並非特別嘅崗位，一般弟兄姊妹都可以參與，佢就問：「所以愈專門的、唔係個個做到的，大家愈支持外判，而非專門的，大家就覺得唔能夠假手於人？」

Chapman再進一步問，如果由而家開始，有堂會設立「營會師」崗位專搞camp，而且做得愈來愈專，甚至神學院都開埋培訓課程，會唔會若干年後，大家都會覺得搞camp至要有少部份有恩賜同訓練嘅人先做得，或者覺得佢哋做會更好？

曾經做過教會的福音營、佈道會、影音製作等外判嘅紐約神學教育中心網絡媒體宣教副總監歐建樑 歐春麗 覺得，調查結果見到弟兄姊妹較接受外判嘅講道同帶敬拜，都係每個星期崇拜會用到、好功能性嘅項目，而其他項目對一般弟兄姊妹就相對無咁「埋身」，反映弟兄姊妹可能對教會講道同敬拜水平唔滿足，所以較接受甚至想藉外判提升質素。

春麗個人贊成適當外判，但如果教會只係畀錢解決問題，反而會令到教會凝聚力減低，亦會製造比較。佢強調返教會唔係只為「聽好嘢」，而係透過事奉去建立生命，最理想係用外判帶返起弟兄姊妹嘅動力。佢認為即使外判咗事工，弟兄姊妹都需要commit，透過同機構一齊傾同合作，喺做嘅過程中跟專業嘅人學習，下一次就可以試吓自己做，咁先至係健康。

文：LH