話說有一日，身為鏡粉嘅小編去開油麻地食飯，見到有個排檔擺咗啲應援，就吸引咗我嘅目光👀

細心一睇，原來個排檔叫「#廣東道助你事務所」，係由一班大學生策劃嘅，佢哋盼望透過呢一年嘅行動嚟聯繫社區。事務所每星期會開兩日，當街坊有需要嘅時候，只要係能力範圍內，都會盡力幫佢哋，例如幫派蔬果包嘅慈善機構包裝、幫果汁店翻新餐牌、幫街坊搬吓嘢咁。有時服務完啲街坊，又可能會收到佢哋送嘅小食，呢種Connection唔單止係班學生好想做到嘅嘢，亦都係呢個社會好需要嗰種互助互愛嘅精神！

雖然枱上面嘅應援相當吸睛，但其實仲有其他街坊寄賣嘅嘢，而負責呢個計劃嘅學生亦想透過以物易物或自由定價嘅方式，去增加彼此嘅連繫💚

油麻地裡面應該有唔少故事，分享亦唔係只局限於物質。小編行過呢條街嘅時候，諗返起幾年前都同啲朋友去過附近探訪，喺過程中都會聽到佢哋分享嘅故事。可能冇咩嘢可以做到，但嗰刻做到嘅或者都只係得聆聽，同埋有少少物資可以同佢哋分享返。

「廣東道助你事務所」逢星期二、五，下午2:00 – 6:00開放，如果大家路過可以支持吓，搵佢哋傾吓計～

文：MM7