明愛國際管理層突遭清零

明愛國際管理層突遭清零（唔係明愛國際賓館呀！）

天主教教宗方濟各在11月22日（星期二）突然發出通諭，委任一名資深管理人做「明愛國際」（Caritas Internationalis）嘅臨時管理人，撤換該機構原有嘅管理層。呢件事，在西方社會大受矚目，轟動程度不下於阿根廷在世界盃爆冷慘敗於沙特阿拉伯腳下。究竟明愛國際爆咗咩大鑊，搞到仁愛為懷嘅教宗都要手起刀落呢？

根據天主教新聞網（CNA）的報道和分析，教宗早在2021年就派人對明愛國際做深層檢討，到今年10月中聽取報告之後，就有今次公佈；而教宗方濟各派人深層檢討梵蒂岡轄下嘅直屬組織，其實近年一直都有發生，並唔係特別針對明愛。只不過，明愛國際規模龐大，自從1951年創立以來，而家聯繫住全球200個國家嘅162個慈善機構；就以香港來講，差唔多係人都起碼聽聞過明愛個大名。咁大棵樹被搖動，當然矚目啦！

梵蒂岡嘅新聞公佈同CNA報道都話，並無證據顯示明愛國際有財務失當或者性失德，但係發現機構內部有嚴重嘅管理缺失同埋程序問題，嚴重損害團隊精神同員工士氣。不過，CNA嘅分析就認為，教宗嘅目的，其實係想全盤改革明愛國際，包括佢嘅地位同法規。

文：DJ