懶鬼神學：《飯氣攻心》三兄弟在教會……
《飯戲攻心》有三兄弟，陳鴻（子華神），陳禮（張繼聰）和陳熹（陳湛文），他們分別代表了三個世代。
陳鴻是中老年（大約六十歲），他好傳統，因為阿媽講過：「爐在，屋在」，所以一直死守間屋，話唔賣就唔賣。陳禮是中生代（大約四十歲），他會捉緊時機，有咩可以賺錢既都會入貨短炒，就連拍拖都可以愛上大佬前度，機關算盡。陳熹（大約三十歲）成長於電子科技最火紅的時代，他志願是做打機達人，唔會依從傳統方法生存，甚至祖屋也可以賣咗佢，大家分錢去做自己想做既事。最後三個年代的男人炒了大鑊。
嗯嗯，這個現象似唔似你教會呀？
▍ 教會三代人2019年勢成水火
N年前呂大樂有本書叫做《四代香港人》（噏得出呢本書就知我咩料啦，「噏得出」都寫得出，就知我係石器時代啦卦），到今天仍然啱用。現在教會大部份話事的都是第二代的香港人（戰後嬰兒潮，baby boomer，即大約一九四六年至一九六五年出世嗰班人）。
陳鴻就是baby boomer，這一代人是成熟、世故、有些錢的代表。他們要守著很多教會傳統，「擘餅聚會在，教會在」，「生命聖詩在，教會在」，「和合本在，教會在」。
陳禮當然就是第三代香港人，機靈、不默守成規、有位走就走。教會點解要將D錢放晒落定期呀，買匯豐或恒生收息，甚至買返幾層樓等佢升值唔好咩？陳鴻就會話，嗱嗱嗱，D錢係弟兄姊妹奉獻俾教會，我們要做好管家，所以穩陣最重要，你睇而家樓股大跌，我當初係咪啱先。我雖然保守咋喎，但D錢仍在，錢在，教會在。陳禮就會話，我叫你地買樓既時候係二〇〇九年喎。
陳熹就代表新生代，教會睇聖經梗係用手機、教會報告利用下影音和剪片啦，聖經問答比賽仲舉手作答？利用下科技好唔好？而陳鴻就會話，睇聖經梗係要hard copy，有質感，有重量，用手機想mark隻字都唔得，喂，唔係唔得，係你陳鴻唔識咋。同埋老實呀，陳鴻你仲會唔會用得返你常常mark信息個本聖經？人有老花架，年輕個本聖經，mark最多野個本聖經，D字已變了蚊滋咁細，點睇呀！
懶鬼也聽過好多六十開外的講員，死都唔用PPT，要人揭聖經，話咁先有味道也追到前文後理。Fine，無話唔係，但唔好一定當係金科玉律，有D群體係有PPT既需要架。
最後這三代人唔妥到出哂面是由二〇一四年開始，去到二〇一九年就更是勢成水火，於是好似陳氏三兄弟咁，在最後一幕暴走開戰。
▍ 化解世代之爭：互相了解
邊個去化解這場恩怨？係三兄弟個阿媽，最搞鬼係阿媽同陳鴻講，我有講過爐在，屋在咩？唔鬼記得啦。最緊要係咩呀：「打開門，行出去，行遠D」。
有無聽過堂主任咁同你講，呢個傳統唔係我話架，係前前前堂主任定落黎，要改，會引起好大的不便和哄動架。實情係而家個堂主任想這個傳統永續落去，於是前前前堂主任就食硬這隻死貓，因為通常呢個級數的堂主任都主懷安息咗。
有無得化解世代之爭？懶鬼一直覺得有，但最後雙方都唔肯做之麻。個方法就係陳鴻一代要多了解陳熹一代，但同時，陳熹一代都要去理解下大哥點解要死守著一些傳統，而唔係一句話你D諗法out咗啦就得。方法雖然好簡單，好老土，但老土的方法通常係work架。
另外，陳鴻一代的人又不可以輸打嬴要，即係搞音響、搞剪片、帶camp就用盡陳熹一代，但只要俾少少不合傳統的意見就唔鬼理人，懶鬼唔建議呀，他們不是工具人囉！年輕一代又可以試下問長老級，點解佢地死都要守住唱《頌主聖歌》和用《和合本》，了解咗之後又或者會有新的體會呢，最起碼是明上一代信徒的諗法呀。
就正如新世代一揀有關信心的詩歌，就要唱「鹹蛋音樂事工」 @saltedeggmmhk 的〈憑信跨過〉才算係一件事，而點解唔可以唱返隻〈深知所信〉先，都係講信心咋喎（利申，懶鬼好喜歡〈憑信跨過〉這首歌架）。
如果次次都要安息主懷的老牧師（類比廖子妤）報個夢俾你才改變，咁會唔會太chur呀（我講安息主懷既牧師）。
文： 懶鬼神學
（分題由編者所加）
