有一年帶中學生營，完咗之後太太同其中一位年輕執事講：XXX（中學生）對主好有熱心、好有才華，又好肯鼓勵細過佢嘅學生，教會要mark實。

呢位年輕執事回應話：放心啦，牧師已經mark實佢。

結果XXX的確俾牧師mark實咗，不過係升到大專之後負責每個星期六日嘅婚禮音響。間教會要透過婚禮賺取收入，但成年人有本業有家庭唔會個個星期六同你搞。牧師識嘅大專生數埋剛剛兩隻手指，於是點去做婚禮。

幾年前响街上撞返XXX，佢同我講已經冇返教會好耐了。當時佢亦同我講，响IG見到以前細過佢嘅學生嚟咗我而家嘅教會，而且肯委身事奉，好為佢哋感恩。

我事後再問相關人士點解XXX唔再返教會，佢哋嘅回覆係XXX掛住拍拖，所以大專畢業之後就冇返了。

▍ 過份重視年輕人？

青少年同工圍爐，總會有以下感受：牧會N年，總會有人响背後話大家過份重視年輕人，而我哋一般都承認。好坦白講，時間有限，同工唔多，大家都有自己嘅限制，亦知自己嘅虧欠。

不過對住今日教會老化、斷層、青少年主日冇青少年嘅年代，堂會要「生存」落去，重心應該放响邊度？點解可以有本錢認為傳道人「過份」重視年輕人？難道傳道人從青少年工作free出嚟，大家就願意take up青少年事工，承諾用三五七年時間走去做團契導師策劃營會，甚至了解年輕人嘅生活方式同佢地成長？

當評論多於了解，一切只係流於虛無。

有時堂會老化唔係冇原因的。