如果大家同一拳一樣，都感覺2024年好難行，2025年唔知點樣再行落去？容許館長同大家分享兩個人物故事，或許你會跟我一樣得到一啲啟示。

兩個都係納粹集中營嘅倖存者。兩個都有出書講返佢哋嘅經歷。先講一個非常赤裸，大家或者唔容易接受，但係又好真實，唔到我哋唔去思考。R不單只自己被送往集中營，自己爸爸都遭遇同樣命運。不久之後，爸爸感染傷寒，身體虛弱，R每天都去探爸爸，問候佢嘅身體狀況。在回憶錄中，R坦誠向讀者承認，其實當時每一日探望爸爸嘅時候，都好想問佢一個問題，但係衝破唔到內心嘅關口，一直冇問到。於是佢用各種方法希望爸爸自己提出，但係爸爸一直都冇提及。佢想問爸爸乜嘢問題呢？佢想爸爸自己提出嘅話題係乜嘢呢？就係關於佢嗰份麵包。因為實在太肚餓，關心爸爸嘅同時，佢承認佢好關心嗰份麵包。爸爸身體虛弱冇胃口，嗰份麵包應該冇食到，我可唔可以食埋佢嗰份？呢個就係R每一日嘅內心掙扎。最後有一日去到探爸爸嘅時候爸爸已經死咗。佢即時搵爸爸會唔會留低咗麵包未食，但係佢搵唔到。佢好傷心，除咗爸爸離開咗之外，仲有嘅就係爸爸嗰份麵包畀其他人食咗。

R為咗得到麵包，喺集中營裏面仲有另一個故事。雖然都係絕望嘅猶太人，但係裏面都有階級之分。有一日集中營其中一個大佬睇中咗R，於是攞麵包畀佢食，同時間性侵犯咗佢。R冇出聲反抗，亦冇阻止佢，因為捱餓已經去到一個點，有麵包食但要畀人性侵犯，都好過冇麵包食而餓死。另外，納粹除咗猶太人，都好憎同性戀，所以告發佢嘅話，自己都會立即死埋一份。目前嘅處境，最緊要唔好死，有麵包食最緊要。為咗復仇，佢趁機會偷咗呢個人頂cap帽。納粹軍人每日朝頭早都會檢查大家嘅制服，冇咗頂帽嘅人，會立即被槍決。於是第二朝早會嘅時候呢位大佬被軍人開槍殺死咗，而R一啲都冇難過，反而好慶幸自己可以生存到落去。R喺回憶錄講，集中營係地獄，身邊全部都係野獸，要喺野獸中生存到落去只得一條規則，就係你必須踩住屍體行上去，先至可以生還。

另一個生還者T，都寫咗一本回憶錄，講另一種生存下去嘅可能性。T被選中去做苦工，因為軍人講柏林地區嘅諺語，T聽唔明白，於是被狠狠打一身，眼鏡跌落地下爛曬。一個有深近視嘅人，冇咗眼鏡乜都睇唔到，即係冇咗工作能力，冇咗工作能力嘅人唔使兩三日就會被送死。所以T千方百計要搵返一副眼鏡，如果唔係就死路一條。喺集中營係有眼鏡賣嘅，重要嘅係你有冇錢。

首先點解會有眼鏡賣？因為每日都死好多人，佢哋嘅眼鏡會被收集。如果大家有睇過集中營相關嘅記錄或者文學，都會知道有一個小隊叫做Canada，就係專收集死去嘅人嘅財物嘅工作小組。呢班人可以靜靜雞收起一啲物資去賣錢。T就係需要呢班人幫手。你要佢哋幫手就要畀錢。集中營裏面都有「錢」，總共有三種唔同嘅錢。最高級嘅錢係Vodka，必須能夠外出工作嘅囚犯先至能夠得到呢種錢。中級嘅錢係香煙，而最後一種錢就係麵包。T有機會得到嘅就係最後呢種錢，但係要儲到足夠嘅麵包換返一副眼鏡，T可能就已經餓死咗。而且時間無多，冇咗眼鏡做唔到苦工，都係會被打死。喺呢個危急關頭，發生咗一件事。

同阿T喺同一個貧民區成長嘅幾個人，都一齊被送咗喺呢個集中營，佢哋決定捐出自己部份嘅麵包，等阿T可以用嚟換一副眼鏡生存落去。大家都唔夠食，日日幾乎要餓死，但係為咗救人，同伴都選擇再食少啲，搏一搏自己唔死得，希望盡力救到阿T。最後成功咗，阿T唔單只捱過咗呢一關，仲捱到可以出到集中營冇死，2024年嘅今日，九十幾歲嘅佢仲繼續以歷史學家嘅身份到處演講，用佢嘅經歷警醒世人。

2025年要點樣行落去？除咗學習阿T同埋伙伴嘅團結互助，R為求生存下去而不顧一切的決心也非常緊要。經歷到阿T嘅際遇當然美好，但係能夠咁幸運嘅又有幾多人？為咗生存到落去，忍受難捱嘅痛苦，誠實面對自己嘅幽暗、需要和界線，前者係無可避免，後者亦係不可逃避。

太過一面倒陽光嘅故事只係糖衣，一拳要講吓不能不直面嘅現實。

共勉之。

2025年繼續同行