「職場神學」主要探討如何在日常工作和職業生活中應用基督教的信仰和價值觀。按我粗略理解，由於東西文化與文字演繹的差異，職場神學並沒有既定標準答案，但圍繞內容總離不開尋找工作的神聖意義、職場做好見證傳福音、工作兩難之間如何取捨，與工作生活平衡等等，總之就係借工作成為榮耀上帝的工具，在職場上活出基督徒樣式。

但聽說太理想的一切都不可接觸，神聖有時不一定要設法去捕捉。

返工返到想死，仲要諗咩「職場神學」？我做完個project就想走，畀老闆捉去飲嘢Happy Hour，唔計OT錢仲要迫自己講耶穌吹水？你明唔明白已經攰到核爆。工作有無「神聖意義」？我只係想行開吓，忘記吓搵意義呢件事，純粹想好好地休息，放工去旅行已經足夠。

神學教育要革新，有時要一啲以下犯上嘅勇氣，破舊立新就要有推倒重來嘅決心。平時聽得太多有關職場神學教學邏輯，我覺得骨子裡總是有點不妥當。要探討新「職場神學」可能性，不如實際啲，所有嘢由工人得收足人工開始，工作做好本份就夠。老闆諗好公司方向，知道自己想點，唔好以為自己出糧就可以將脾氣發洩喺員工身上，咁已經係一個非常好嘅老細。

為咗避免「職場神學」離地到上咗月球，小弟希望找一個另類貼地嘅方式去連結，嘗試搵過一個平衡點。等你返工嘅時候，就算解答唔到「邊一個發明了返工」，起碼有一種神學說法，你以後工作需要搵意義嗎？其實大部份工作都無乜意義，大把人同你一樣，最少you are not alone。

我認為傳統的職場神學可能過於理想化，忽視了現實工作中的壓力和困境。許多人工作到精疲力竭，難以在職場中實踐高尚的神學理念，「職場神學」不如先呼籲一個人簡單做好一份工嘅要求，基本上已經盡忠。神學教育工作者必須接納，工作可能缺乏深層意義，但這是普遍現象，不必過份以大使命、救世者方式教導職場神學。

我建議新的職場神學從工人的實際需求出發，而非過份理想化。在繁忙的社會中找回做人的熱情，比追求深奧的職場神學更為重要。神學教育應提供一個更實際、更人性化的職場信仰觀。​​​​​​​​​​​​​​​​再說白一點，職場神學就是輔導神學。

（本文原載於作者專頁，經作者修訂。標題為編者所擬。）